އައްޑޫގެ ގެތަކަށް ޕީޕީއެމްގެ ފަރާތުން ކެމްޕެއިން ކުރުމަށް ދިއުމުން އޭގެ ތެރެއިން ބައެއް ގެތަކުން ކެމްޕެއިން ޓީމުތައް ނެރެލައިފިއެވެ.
ސޯޝަލް މީޑިޔާގައި ދައުރުވަމުންދާ އެއް ވީޑިއޯއިން ފެންނަނީ ހިތަދޫގެ ގެއަކަށް ޕީޕީއެމްގެ ޓީމަކުން ދިއުމުން އެމީހުން އެގެއިން ނެރެލާ މަންޒަރެވެ. އެވީޑިއޯ އިން ފެންނަ ގޮތުގައި ޕީޕީއެމް އަށް ނިސްބަތްވާ ބަޔަކު "ސާވޭ ކުރުމަށް" ކަމަށް ބުނެ ގެއަކަށް ދިއުމުން އެގޭގެ މީހުން ވަނީ ރުޅިވެރިކަމާއި އެއްޗެހި ގޮވައި ގެއިން ނެރެލާފައެވެ.
PPM campaign team e hithadhoo geaka vanumun beyru kollanee pic.twitter.com/GzesQxz7uA
— adduLIVE (@addulive) July 2, 2018
މައުލޫމާތު ލިބިފައިވާ ގޮތުގައި އެ ގެއަށް ދިޔަ ޓީމަކީ މިހާރު ޕީޕީއެމްގެ ފަރާތުން ހިތަދޫގައި ކުރިއަށް ގެންދާ ސާވޭ އަކަށް ދިޔަ ޓީމެކެވެ. އެގެއިން އެމީހުން ނެރެލާފައި ވަނީ ޕީޕީއެމްގެ ސާވޭއެއް ކަމަށް ބުނެ ވޯޓާއި ގުޅޭ ވާހަކަތައް ދައްކަން ފެށުމުންނެވެ.
ޕީޕީއެމްގެ ޓީމުން ގެތަކަށް ދަނީ "ސާވޭ އެއް ކަމަށާއި މިއީ ސިޔާސީ ކަމެއް ނޫން" ކަމަށް ބުނެއެވެ.
ސާވޭ ކުރުމަށް ކަމަށް ބުނެ ގޭބިސީތަކަށް ޕީޕީއެމްގެ ޓީމުތައް ދާން ފަށާފައި ވާއިރު ފެނަކަ މުވައްޒަފުން ވެސް ސާވޭ އަކަށް ކަމަށް ބުނެ އައްޑޫގެ ބައެއް ގޭބިސީތަކަށް ޒިޔާރަތް ކުރަން ވަނީ ފަށާފައެވެ.
ފެނަކަ މުވައްޒަފުން ކަރަންޓާއި ބެހޭ ސުވާލުތަކެއް ކުރުމަށް ފަހު ގޭގެ މީހުން ތާއީދު ކުރާ ޕާޓީ މައުލޫމާތާއި ފޯނު ނަންބަރު ފަދަ އާއްމު ރައްޔިތުންގެ ޒާތީ މައުލޫމާތު އަހާ ކަމަށް ބުނެ ގިނަ ބަޔަކު ދަނީ ސޯޝަލް މީޑިޔާގައި ނުރުހުން ފާޅުކުރަމުންނެވެ.