ޕެރިސް ސެއިޓް ޖަރުމަނަށް ކުޅެމުން އަންނަ ބްރެޒިލްގެ ވިންގަ ނޭމާ ގަތުމަށް 310 މިލިއަން ޔޫރޯ ދައްކަން ރެއާލް މެޑްރިޑުން ހުށަނާޅާ ކަމަށް އެ ކްލަބުން ބުނެފި އެވެ.
ރެއާލް މެޑްރިޑާއި އެންމެ ވާދަވެރި ބާސެލޯނާ ދޫކޮށް ނޭމާ ޕީއެސްޖީ އަށް ބަދަލުވިފަހުން އޭނާ އާއި ރެއާލްމެޑްރިޑުން ދަނީ ވާހަކަ ދައްކަމުންނެވެ.
ސްޕެއިންގެ ޕަބްލިކް ބްރޯޑްކާސްޓަރ "ޓީވީއީ" އިން ރިޕޯޓްކުރި ގޮތުގައި ނޭމާ ގަތުމަށް ރެއާލް އިން ވަނީ 310 މިލިއަން ޔޫރޯގެ އަގެއް ދައްކަން ޕީއެސްޖީއަށް ހުށަހަޅާފައެވެ.
އެހެން ނަމަވެސް މި ވާހަކަތައް ދޮގުކޮށް ރެއާލް އިން ނެރުނު ބަޔާނެއްގައި ބުނެފައިވަނީ އެ ކްލަބުން ނޭމާ އަށް ވެސް އަދި ޕީއެސްޖީއަށް ވެސް އެފަދަ އަގެއް ހުށަހަޅާފައި ނުވާ ކަމަށެވެ.
"ރެއާލް މެޑްރިޑް އަކުން ޕީއެސްޖީއަށް އަދި ކުޅުންތެރިޔާ(ނޭމާ) އަށް ވެސް އެފަދަ އެއްވެސް ހުށަހެޅުމެއް ހުށަހަޅާފައެއް ނުވާނެ" ރެއާލްގެ ބަޔާނުގައި ބުނެފައިވެއެވެ.
މީގެ އިތުރުން ރެއާލްގެ ބަޔާނުގައި ބުނެފައިވަނީ އެ ކްލަބާއި އެއްވެސް ވަރަކަށް ގުޅުމެއް ނެތި "މުޅިން ދޮގު ޚަބަރެއް" ސްޕެއިންގެ ޕަބްލިކް ޓީވީ އިން ފެތުރުމުން ކަންބޮޑުވާ ކަމަށެވެ.