ރައްޔިތުންގެ މަޖިލީހުގައި އެކި ޤާނޫނުތަކަށް ހުށަހަޅާ އިސްލާޙުތަކަށް ބައެއް މެންބަރުން ހަމައެކަނި ޓްވީޓުތަކުން ފާޑުވިދާޅުވާތީ އެކަމާއި ހިތާމަކުރައްވާ ކަމަށް ފޭދޫ ދާއިރާގެ މަޖިލިސް މެންބަރު އިބްރާހިމްދީދީ (އައިބީ) ވިދާޅުވެއްޖެެއެވެ.
ހޯމަ ދުވަހު ބޭއްވި މަޖިލީހުގެ ޖަލްސާގައި ވާހަކަ ދައްކަވަމުން އައިބީ ވަނީ އިދިކޮޅު މެންބަރުން ޖަލްސާތަކުގައި ބައިވެރިނުވާތީ އެކަމަށް ވަރަށް ބޮޑަށް ފާޑު ވިދާޅުވެފައެވެ.
އިދިކޮޅު މެންބަރުން ޖަލްސާތަކުގައި ބައިވެރި ނުވަނީ، މަޖިލީހުގެ ޖަލްސާތައް ކުރިއަށް ގެންދަނީ މަޖިލީހުގެ ގަވާއިދާ ހިލާފަށް ކަމަށް ބުނެއެވެ. އިދިކޮޅު މެމްބަރުން ޖަލްސާތައް ބޮއިކޮޓް ކުރީ ގަދަބާރުން މަޖިލީހުގެ ރައީސް ކަމުގެ މަގާމުގައި ފުވައްމުލަކު ދެކުނު ދާއިރާގެ މެމްބަރު އަބްދުﷲ މަސީހު މުހައްމަދު އިންނަވާތީ ކަމަށް ބުނެއެވެ.
"މަޖިލީހަށް ހުށަހަޅާ އިޞްލާޙުތަކަށް ހަމައެކަނި ޓްވީޓުތަކުންނާއި، މަގުމަތީގައި ތިބެގެން ފާޑުކިޔަން އަޅުގަނޑުމެންގެ މަޖިލީހުގެ ބައެއް އިއްޒަތްތެރި މެންބަރު ތިއްބަވާތީ އަޅުގަނޑު އެކަމާ ހިތާމަކުރަން." އައިބީ ވިދާޅުވިއެވެ.
އައިބީގެ އިތުރުން ވެސް ޕީޕީއެމްގެ ޕީޖީ ލީޑަރު ނިހާނު ވެސް ވަނީ އިދިކޮޅު މެންބަރުން މަޖިލީހުގެ ޖަލްސާތަކުގައި ބައިވެރިވެވަޑައިނުގަންނަވާތީ އެކަމަށް ފާޑު ވިދާޅުވެފައެވެ.