މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ރިޔާސީ ޓިކެޓަކީ "ލޮނދި" ޓިކެޓެއް ކަމުގައި ޕީޕީއެމްގެ ޕީޕީއެމްގެ ނައިބް ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
އޭނާ މިހެން ވިދާޅުވީ ށ.މިލަންދޫގައި މިއަދު އެމްޑީޕީގެ ރިޔާސީ ޓިކެޓާއި ބެހޭގޮތުން އެޕާޓީގެ ކޮންގްރެސް އިން ފާސްކުރި ކަންތަކަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވަމުންނެވެ.
އެމްޑީޕީގެ ޓިކެޓް "ލޮނދި" ކަމަށް ވިދާޅުވެ ވާހަކަ ދައްކަވަމުން އަބްދުއްރަޙީމް ފާހަގަކުރެއްވީ އެންމެ ފަހު ވަގުތު ވެސް ރައީސް ނަޝީދަށް ވާދަ ކުރެވޭ ނަމަ އެމަނިކުފާނަށް އެފުރުސަތު ދޭން އެމްޑީޕީގެ ކޮންގްރެސް އިން ފާސްކޮށްފައިވުމެވެ.
މީގެ އިތުރުން އަބްދުއްރަޙީމް ވަނީ އިބޫއަށް ރައީސް ނަޝީދާއި އެމްޑީޕީން އިތުބާރު ނުކުރާ ކަމަށް ވިދާޅުވެފައެވެ. އިބޫ އަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވަމުން އަބްދުއްރަޙީމް ވިދާޅުވީ، އެމްޑީޕީގެ ޕީޖީ ލީޑަރަކަށް ހުންނަވައިގެން ނުކުރެވުނު ކަމެއް އެހެން މަގާމެއްގައި ހުންނަވައިގެން ވެސް އިބޫ އަށް ނުކުރެއްވޭނެ ކަމަށެވެ.