ސެއިންޓް ޕީޓަސްބާގް، ރަޝިޔާ: ވޯލްޑްކަޕް ގެ ދެވަނަބުރުގައި ސްވިޒަލޭންޑް 1-0 އިން ބަލިކޮށް ސްވިޑަން ކުއާޓަރ ފައިނަލަށް ދަތުރުކޮށްފިއެވެ.
މިއީ 1994 ވަނަ އަހަރުގެ ފަހުން ސްވިޑަން ވޯލްޑްކަޕްގެ ކުއާޓާ ފައިނަލުން ޖާގައެއް ކަށަވަރުކުރި ފުރަތަމަ ފަހަރެވެ. މީގެއިތުރުން އެޓީމު އެންމެ ފަހުން ވިދިވިދިގެންް ދެމެޗު ކާމިޔާބުކުރި 1954 ވަނަ އަހަރުގެ ވޯލްޑްކަޕްގައި އެޓީމު ބަލިވެފައިވަނީ ފައިނަލްގައެވެ. މިމެޗުން ބަލިވި ސްވިޒަލޭންޑުން 1954 ވަނަ އަހަރުގެ ފަހުން ވޯލްޑްކަޕްގެ ކުއާޓާ ފައިނަލަށް ދަތުރުކޮށްފައިނުވެއެވެ.
މިމެޗުގެ ފުރަތަމަހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔަނަމަވެސް ގިނަވަގުތު ބޯޅަ ގެންގުޅުނީ ސްވިޒަލޭންޑުންނެވެ. އެހެންނަމަވެސް މިހާފުގައި ގޯލަށް ނުރައްކާކޮށްފައިވަނީ ސްވިޑަން އިންނެވެ. އެގޮތުން އެންމެ ރަނގަޅު ފުރުޞަތެއް ލިބުނީ އެޓީމުގެ އަލްބިން އެކްޑަލް އާއި މާކަސް ބާގް އަށެވެ. މީގެއިތުރުން ސްވިޒަލޭންޑް ގެ ބްލެރިމް ޖެމައިލީ އަށް ވަނީ ރަނގަޅު ފުރުސަތެއް ލިބި ބޭކާރުވެފައެވެ.
ފުރަތަމަހާފު ނިމިގެންދިޔައީ ދެޓީމަށް ލަނޑެއްނުޖެހި އެއްވަރުވެގެންނެވެ.
މިމެޗުގައި ފެނުނު ހަމައެކަނި ލަނޑު 66 ވަނަ މިނެޓުގައި ކާމިޔާބުކުރީ ސްވިޑަން އިންނެވެ. މިލަނޑު ޖަހައިދިނީ އެމީލް ފޯސްބާގް އެވެ. ޕެނަލްޓީއޭރިޔާގައި ރޮނގުމަތީގައި ހުރެ ފޮނުވާލީ ބޯޅަ ގޯލްގެތެރެއަށް ވަނީ ސްވިޒަލޭންޑްގެ ކުޅުންތެރިއެއްގެ ގައިގަވެސް ޖެހިފައެވެ. މިލަނޑު ކާމިޔާބުކުރި ފޯސްބާގް ވެފައިވަނީ 2002 ވަނަ އަހަރުގެ ފަހުން ނޮކްއައުޓް ބުރުގައި ސްވިޑަން އަށް ލަނޑުޖެހި ފުރަތަމަ ކުޅުންތެރިޔާއަށެވެ.
މިހާފުގައިވެސް ސްވިޒަލޭންޑުން ގިނަވަގުތު ބޯޅަ ގެންގުޅެ ގިނަ ހަމަލާތަކެއް އުފައްދާފައިވީނަމަވެސް ގޯލަށް އަމާޒުކޮށް މާގިނަ ބޯޅައެއް ފޮނުވާލެވިފައެއްނުވެއެވެ. މުޅި މެޗުގައި އެޓީމުން 18 ހަމަލާ ފޮނުވާލާފައިވާއިރު އޭގެތެރެއިން ސްވިޑަން ގެ ގޯލަށް އަމާޒުކޮށްލެވިފައިވަނީ އެންމެ ހަތަރު ހަމަލާއެވެ.
މެޗުނިމެންދަނިކޮށް ސްވިޒަލޭންޑަށް އިތުރު މައްސަލަތައް ދިމާވީ ޕެނަލްޓީ އޭރިޔާގެ ބޭރުން ކުރި ފައުލަކަށް އެޓީމުގެ ޑިފެންޑަރު މިޝެލް ލެންގް އަށް ސީދާ ރަތްކާޑު ދައްކާ ދަނޑުން ފޮނުވާލުމުންނެވެ. ރެފްރީ ވަނީ މިފައުލް ކުރީ ޕެނަލްޓީއޭރިޔާގެތެރޭގައި ކަމަށް ނިންމާ ޕެނަލްޓީއެއް ދިނުމަށް ނިންމާފައެވެ. އެހެންނަމަވެސް ފަހުން ވިއޭއާރްގެ އެހީގައި ބެލުމަށްފަހު އެ ނިންމުން ބަދަލުކޮށް އޭރިޔާގެ ބޭރުން ވަނީ ހިލޭޖެހުމެއް ދީފައެވެ. އޮލާ ޓޮއިވޮނަން ފޮނުވާލި މި ހިލޭޖެހުން ސްވިޒަލޭންޑް ގެ ގޯލްކީޕަރު ޔަން ސޮމާ ވަނީ މަތަކޮށްފައެވެ.
މިމެޗުން މޮޅުވި ސްވިޑަންް ކުއާޓާފައިނަލްގައި ނިކުންނާނީ މިރޭ އިންގްލެންޑާއި ކޮލަމްބިއާ ބައްދަލުކުރާ މެޗުން މޮޅުވާ ޓީމަކާއެވެ.