ފުލުހުންގެ ޚިދުމަތުގެ އެންމެ މުހިއްމު އެއް ސިފައަކީ ހިތްވަރާއި ކެރުން ކަމަށް ކަމަށް ކޮމިޝަނަރު އޮފް ޕޮލިސް އަބްދުﷲ ރިޔާޒް ވިދާޅުވެއްޖެ އެވެ.
ފުލުހުންގެ އަސާސީ ތަމްރީނުގެ 22 ވަނަ ބުރި ނިންމުމުގެ ރަސްމިއްޔާތުގައި ރޭ ވާހަަކަ ދައްކަވަމުން ރިޔާޒް ވިދާޅުވީ ފުލުހުންގެ ޚިދުމަތުގައި ވަރަށް އާދަޔާޚިލާފު ކެރުމާއި ސާބިތުކަން ދެއްކެވުމުގެ ތެރޭގައި ދުނިޔެ ދޫކުރެއްވި އަދި ޝަހީދުވެވަޑައިގެންނެވި ފުލުހުންގެ ޒިކުރާތައް އާކޮށް އެފުލުހުން ދެއްކެވި ނަމޫނާ އިން ޢިބުރަތް ހާސިލު ކުރަން ޖެހޭ ކަަމަށެވެ.
އަލަށް ޚިދުމަތަށް ނުކުންނެވި ފުލުހުންނާ މުޚާތަބު ކުރައްވަމުން ކޮމިޝަނަރު ވިދާޅުވީ ފުލުހުންގެ ޚިދުމަތަށް ނުކުންނެވުމުން އެ ނުކެންނެވުނީ މަގުތަކަށް އަވައްޓެރިންގެ ގާތަށް އަދި މުޖުތަމައެއްގެ ތެރެއަށް ކަމަށެވެ.
އެހެން ކަމުން ރައްޔިތުން ފުލުހުންނާ މެދު އުންމީދު ކުރާ ފަދަ ހިތްވަރާއި ކެރުން ފުލުހުންގެ ފަރާތުން ދެއްކުމަށާއި ރައްޔިތުން ބޭނުންވާ ފަދަ ޚިދުމަތެއް ފޯރުކޮށް ދެއްވުމަށް އެދިވަޑައިގެންނެވި އެވެ.
ހަމައެއާ އެކު ކޮމިޝަނަރުގެ ވާހަކާގައި ފުލުހުންގެ އަޚުލާޤާއި ސުލޫކު ހިފަހައްޓައިގެން ސްކޫލް ކުދިންނަށާއި މުޖުތަމަޢުގެ އެހެން މީހުންނަށް ވެސް އަބަދުވެސް ހެޔޮ ނަމޫނާ ދައްކާ އަދި މަތިވެރި އަޚުލާޤުގެ ވެރި ބަޔަކަށް ވުމަށް ގަދައަޅާ މަސައްކަތް ކުރެއްވުމަށް ތަކުރާރުކޮށް ނަސޭހަތްތެރިވެ ލެއްވި އެވެ.
މިދިޔަ އަހަރުގެ މެއި 27 އިން ފެށިގެން 4 މަސް ދުވަހުގެ މުއްދަތަށް މާލެ އާއި ޅ. މަޑިވަރުގައި ކުރިއަށް ގެންދިޔަ ފުލުހުންގެ އަސާސީ ތަމްރީނު ކޯހުގެ 22 ވަނަ ބުރުގައި 80 ފުލުހަކު ބައިވެރިވެފައިވާ އިރު އޭގެ ތެރެއިން 64 ފުލުހުން ވަނީ ކޯސް ފުރިހަމަކޮށް ދަސްވެނިވެފަ އެވެ.
ކޯހުން އެކި ވަނަތަކަށް ހޮވުނު ފުލުހުންނަށް ތައްޓާއި ހަނދާނީ ލިޔުން ދީފައިވެ އެވެ. އެގޮތުން މުޅި ކޯހުން ހުރިހާ ގޮތަކުން އެންމެ މޮޅު ފުލުހަކަށް ހޮވިފައި ވަނީ ބީފާނު ސްކޮޑުގެ އެންމެ މޮޅުދަރިވަރަކަށް ވެސް ހޮވުނު ޕޮލިސް ކޮންސްޓަބަަލް އަބްދުލް ޙަމީދު އަޙުމަދު އެވެ.
އޭނާ އަށް މި މަޤާމު ހާސިލުވުމާއި ގުޅިގެން ރޭގެ ރަސްމިއްޔާތުގައި ވަނީ ކޮމިޝަނަރު އޮފް ޕޮލިސްގެ އެކްސެލެންސް އެވޯޑްވެސް ހަވާލުކޮށްފަ އެވެ. މި އެވޯޑް ހަވާލުކޮށްދެއްވީ ކޮމިޝަނަރު އޮފް ޕޮލިސް ޢަބްދުﷲ ރިޔާޒް އެވެ.