ގާނޫނު ތަންފީޒުކުރާ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާ އުފުލާފައިވާ ގަލޮޅު ދެކުނު ދާއިރާގެ މެންބަރު އަހްމަދް މަހްލޫފް، އޭނާގެ މައްޗަށް މާދަމާ ހުކުމްކުރުމަށް ހަމަޖެހިފައިވާ ކަމުގެ މައުލޫމާތު ލިބިވަޑަގެންފައިވާ ކަމަށް ވިދާޅުވެއްޖެއެވެ.
މަހްލޫފްގެ މައްޗަށް ކުރާ ދައުވާގެ ފަހު އަޑުއެހުން މާދަމާ 11 ޖަހާއިރަށް ވަނީ ތާވަލްކޮށްފައެވެ.
މަހުލޫފް މިރޭ ކުރައްވާފައިވާ ޓްވީޓެއްގައި ވިދާޅުވީ މާދަމާގެ އަޑުއެހުމުގައި "ހުކުމްކުރުމަށް ނިންމާފައިވާކަން ވަރަށް ޔަގީންކޮށް މައުލޫމާތު ލިބިފައިވާ"ކަމަށެވެ. މިވަގުތު ގޭބަންދުގައި ހުންނެވި މަހްލޫފް ވިދާޅުވި ގޮތުގައި އޭނާ ޖަލަށްލީ ނަމަވެސް ކުރަމުންދާ އިސްލާހީ މަސައްކަތުގައި ފަސްޖެހުމެއް ނެތެވެ.
މަހްލޫފް ވިދާޅުވެފައި ވަނީ "މާތްﷲގެ އިރާދަފުޅުން ދެން ޖަލުން އެނބުރި އަންނަނީ 23 ސެޕްޓެމްބަރުގެ އިންތިޚާބުގައި ރައީސް ޔާމީން ބަލިކުރުމަށްފަހު" ކަމަށެވެ.
މީގެ އިތުރުން މަހްލޫފް ވިދާޅުފައިވާ ގޮތުގައި އޭނާގެ މައްސަލަ ނިންމައި ހުކުމްކުރަން އުޅެނީ އިދިކޮޅު މެންބަރުން އަދަދު މަދުކުރުމުގެ ބޭނުމުގައެވެ.