ފީފާ ވޯލްޑްކަޕް 2018ގެ ދެވަނަ ބުރުގައި ސްޕެއިން އާއި ރަޝިޔާ ބައްދަލުކުރި މެޗަކީ ސްޕެއިންގެ ލެޖެންޑް އަންދްރޭ އިނިއެސްޓާ އެ ޓީމުގެ ޖާޒީގައި ކުޅުނު އެންމެ ފަހު މެޗެވެ. އެ މެޗަށް ފަހު ބައިނަލްއަޤްވާމީ ފުޓްބޯޅައިން ރިޓަޔަރ ކޮށްފައިވާ އިނިއެސްޓާ ވަނީ އޭނާގެ އަލްވަދާޢުގެ ސިޓީއެއް ސޯޝަލް މީޑިޔާގައި އާއްމުކޮށްފައެވެ.
ސްޕެއިންގެ ތާރީޚުގައި ހޯދި ހަމައެކަނި ވޯލްޑްކަޕް ކާމިޔާބުކޮށްދިން ގޯލު ޖެހި އިނިއެސްޓާ އަށް ސްޕެއިން ސަރުކާރުން ވަނީ ކުޅިވަރަށް ހިދުމަތްކޮށްދޭ ފަރާތްތަކަށް ދޭ އެންމެ ޝަރަފްވެރި އެވޯޑް ވެސް ވަރަށް ފަހުން އަރުވާފައެވެ.
"14 އަހަރު ކުރިން އަހަރެން ޤައުމީޓީމުގެ ޖާޒީ އެންމެ ފުރަތަމަ ފަހަރަށް ލިން. އޭރު އަހަރެންގެ އުމުރަކީ 15 އަހަރު، އެ ދުވަސް ދުވަހަކު ވެސް ހަނދާނެއް ނުނެތޭނެ" އިނިއެސްޓާގެ ސިޓީގައި ބުނެފައިވެއެވެ.
އިނިއެސްޓާ ބުނެފައިވަނީ ފާއިތުވި އަހަރުތަކުގައި ސަޕޯޓަރުން ފަޚުރުވެރިކުރުމަށް ވަރަށް މަސައްކަތް ކޮށްފައިވާނެ ކަމަށެވެ. އަދި ސްޕެއިންގެ ޤައުމީ ކުލަތަކުގެ ދިފާޢުގައި ކުޅުމަކީ އޭނާ އަބަދުވެސް ދެކެމުން އައި ހުވަފެނެއް ކަމަށެވެ. "އެއީ ވަރަށް ޚާއްސަ ކަމެއް، ހުވަފެނެއް އެކަންޏެއް ނޫން، ވަރަށް ބޮޑު ޒިންމާއެއް ވެސް މެ"
އިނިއެސްޓާގެ ސިޓީގައި އޭނާ ސިފަކޮށްފައިވާ ގޮތުގައި ސްޕެއިންގެ އެންމެ މޮޅު ޖެނެރޭޝަން އާއި އެކު ކުޅުމުގެ ފުރުސަތު ލިބުމަކީ ވަރަށް ބޮޑު ނަސީބެކެވެ.
ދުނިޔޭގައި އުފެދުނު އެންމެ މޮޅު އެއް މިޑްފީލްޑަރު ވަނީ ސްޕެއިން ގައުމީ ޓީމާ އެކު 2010 ވަނަ އަހަރުގެ ވޯލްޑް ކަޕް އަދި 2008 ވަނަ އަހަރާއި 2012 ވަނަ އަހަރު ޔޫރޯ ކާމިޔާބުކޮށްފަ އެވެ.
"އަހަރުމެން ވަރަށް ބޮޑެތި ކާމިޔާބީތައް ހޯދިން، އޭގެ ތެރޭގައި އަހަރުމުން ކުޑައިރު ދެކުނު ހުވަފެންތައް ހިމެނޭ. އެކަމަކު އަހަރުމެން ވަރަށް ހިތްދަތި ވަގުތުތަކާއި އުނދަގޫ ހާލަތްތައް ވެސް ތަޖުރިބާކުރިން" އިނިއެސްޓާގެ ވަދާޢީ ސިޓީގައި ބުނެފައިވެއެވެ.
ކްލަބް ކެރިއަރުގައި ބާސެލޯނާ އާއި އެކު ސްޕެނިޝް ލީގު އަށް ފަހަރު އަދި ޗެމްޕިއަންސް ލީގު ހަތަރު ފަހަރު ހޯދާފައިވާ އިނިއެސްޓާ ވަނީ އޭނާ މޮޅު ކުޅުންތެރިޔަކަށް ވުމަށް އެހީތެރިވި އެންމެންނަށް ވެސް ޝުކުރު އަދާކޮށްފައެވެ.
"އަހަރެން މޮޅު ކުޅުންތެރިޔަކަށް ވުމުގައި އެހީތެރިކަން ފޯރުކޮށްދިން ހުރިހާ އެންމެންނަށް ވަރަށް ބޮޑަށް ޝުކުރު އަދާކުރަން. ތި މީހުންނާއި އެކު ފާއިތުވި އަހަރުތަކުގައި ކުޅުމުގެ ފުރުސަތު ލިބުމަކީ އަހަންނަށް ލިބުނު ފަޚުރެއް"
އިނިއެސްޓާ އިތުރަށް ބުނެފައިޥާ ގޮތުގައި ސްޕެއިން ޓީމަށް ކުޅުން ހުއްޓާލުމަކީ އޭނާ އަށް ފަސޭހަ ނިންމުމެއް ނޫން ކަމަށެވެ.
2008-2012 އާ ދެމެދު ސްޕެއިނުން ދުނިޔޭގެ ފުޓްބޯޅައިގައި ރަސްކަން ކުރިއިރު އެ ޓީމުގެ އެންމެ މުހިއްމު ކުޅުންތެރިޔަކަށް ހުރި އިނިއެސްޓާ ވަނީ ސްޕެއިންގެ މިހާރުގެ ސްކޮޑުގައި ހިމެނޭ ކުޅުންތެރިންނަށް ވަރަށް ބޮޑަށް ތައުރީފްކޮށްފައެވެ.
އެގޮތުން އޭނާ ބުނެފައިވަނީ ސްޕެއިން ޓީމުގެ ކުރިމަގު ވަރަށް އުޖާލާ ކަމަށާއި އަދި މިވަގުތުން ފެށިގެން އޭނާ އަބަދުވެސް އެ ކުޅުންތެރިންނަށް ހިފެހެއްޓުމެއް ނެތި ސަޕޯޓް ކުރާ މީހެއްގެ ގޮތުގައި ދެމި ހުންނާނެ ކަމަށެވެ.
އިނިއެސްޓާގެ ސިޓީ ނިންމާލާފައި ވަނީ ސްޕެއިންގެ ޤައުމީ ޓީމުގެ އޭނާ ކުޅުނު އިރު އެޓީމުގެ އޮފިޝަލުންގެ ގޮތުގައި ހަރަކާތްތެރިވި އެންމެންނަށް ވެސް ވަރަށް ޚާއްސަ ޝުކުރެއް އަދާކުރުމަށް ފަހުގައެވެ.
އިނިއެސްޓާ އޭނާގެ ކްލަބް ކެރިއަރު ކެރިއަރު 2001 ވަނަ އަހަރު ފެށީ ބާސެލޯނާގެ ބީ ޓީމުންނެވެ. އޭގެ ފަހުން އޭނާ ވަނީ ބާސެލޯނާ އާއި އެކު 32 މުބާރާތެއްގެ ތަށި އުފުލާލައިފަ އެވެ.