ރައީސް އަބްދުﷲ ޔާމީންގެ ވެރިކަމުގައި މީހުން މަރުވި އަދަދަށް ވުރެ މާ ގިނައިން އެމަނިކުފާނު ވެރިކަމަށް ވަޑައިގަތުމުގެ ކުރިން މީހުން މަރުވެފައިވާ ކަމަށް ފޭދޫ ދާއިރާގެ މެންބަރު އިބްރާހިމްދީދީ ވިދާޅުވެއްޖެއެވެ.
އިބްރާހިމްދީދީ މިހެން ވިދާޅުވީ، ރާއްޖެ ޓީވީގެ ޕްރޮގްރާމެއްގައި ރޮޒެއިނާ ދެއްކެވި ވާހަކަފުޅަށް ރައްދު ދެއްވަމުންނެވެ. ރޮޒެއިނާގެ ވާހަކަފުޅުގައި ވަނީ ރާއްޖޭގެ މަގުތަށް އަމާން ނުވާ ކަމަށާއި ރައީސް ޔާމީންގެ ވެރިކަމުގައި ގިނަ ބަޔަކު ގޭންގް މާރާމާރީތަކުގައި މަރާލާފައިވާ ކަމަށް ވިދާޅުވެފައެވެ.
އެވާހަކަތަކަށް ރައްދު ދެއްވަމުން އައިބީ ވިދާޅުވީ "ރައީސް ޔާމީން ވެރިކަމަށް ވަޑައިގަތުމުގެ ކުރިން ރައީސް ޔާމީންގެ ވެރިކަމަށް ވުރެ މާ ގިނައިން މީހުން މަރުވެއްޖެ" ކަމަށެވެ.
އަތުގެ އިޝާރާތުން އެއްޗެއް "ކޮށާލާ" ގޮތް ދައްކަވަމުން އައިބީ ވިދާޅުވީ، "މުޙައްމަދު ނަޝީދުގެ ވެރިކަމުގައި ވެސް މީހުން މަރަމުން" ދިޔަ ކަމަށެވެ. އަދި އައިބީ އިތުރަށް ވިދާޅުވި ގޮތުގައި ރައީސް ޔާމީން ގެންދަވަނީ މީހުން މެރުން ހުއްޓުވުމަށް ގިނަ މަސައްކަތްތަކެއް ކުރައްވަމުންނެވެ.
ރާއްޖެ ޓީވީގެ ޕްރެޒެންޓަރު ރައީސް ޔާމީންގެ ވެރިކަމުގައި ރާއްޖެ އަމާންތަނަކަށް ވެއްޖެތޯ ސުވާލުކުރުމުން އައިބީ ވިދާޅުވެފައި ވަނީ "ރައީސް ޔާމީންގެ ވެރިކަމުގައި ރާއްޖެ ވަރަށް އަމާން ތަނަކަށް ބަދަލުވަމުން" ދާ ކަމަށެވެ.