ރައީސް އަބްދުﷲ ޔާމީންގެ ސަރުކާރުން ޤާނޫނުތަކަށް އިސްލާޙު ގެންނަނީ އެއްވެސް އިޙްލާސްތެރިކަމެއް ހުރެގެން ނޫން ކަމަށް ހިތަދޫ ދެކުނު ދާއިރާގެ މެންބަރު އަލީ ނިޒާރު ވިދާޅުވެއްޖެއެވެ.
ރާއްޖެ ޓީވީގައި ވާހަކަ ދައްކަވަމުން ނިޒާރު ވިދާޅުވި ގޮތުގައި ސަރުކާރުން ޤާނޫނުތަކަށް އިސްލާޙު ގެންނަނީ އަބަދުވެސް ކޮންމެވެސް ޖަރީމާއެއް ހިންގުމަށް ކަމަށެވެ.
ނިޒާރު ވިދާޅުވީ، "ކޮންމެވެސް ޖަރީމާއެއްގެ ވިސްނުން ހުރެގެން ނޫން ގޮތަކަށް ސަރުކާރުގެ ފަރާތުން މިހާތަނަށް އެއްވެސް ޤާނޫނެއް އަދި އިސްލާޙެއް މަޖިލީހަށް ހުށަހަޅާފައި ނުވާ ކަމަށެވެ.
އޭގެ މިސާލެއްގެ ގޮތުން ނިޒާރު ދެއްކެވީ ޓެރަރިޒަމްގެ ޤާނޫނެވެ. އެ ޤާނޫނުގެ ދަށުން ރާއްޖޭގެ ސިޔާސީ ލީޑަރުން ޖަލަށް ލާފައިވާ ކަމަށާއި އަދި ޕީޕީއެމްގެ ލީޑަރު ރައީސް މައުމޫންގެ މައްޗަށް ދައުވާ އުފުލައި އެމަނިކުފާނު ވެސް ބަންދުކޮށްފައިވާކަން ނިޒާރު ފާހަގަކުރެއްވިއެވެ.