އައްޑޫގައި ވިޔަފާރިއަށް ރަޖިސްޓްރީކޮށްފައި ހުރި ބައެއް ފިހާރަތަކުގައި މަސްތުވާތަކެތި ވިއްކަމުން ގެންދާ ކަމަށް ހިތަދޫ ދެކުނު ދާއިރާގެ މަޖިލިސް މެންބަރު އަލީ ނިޒާރު ވިދާޅުވެއްޖެއެވެ.
ރާއްޖެ ޓީވީގައި ވާހަކަ ދައްކަމުން ނިޒާރު މިހެން ވިދާޅުވި ނަމަވެސް ސީދާ އެއީ ކޮން ފިހާރަތަކެއް ކަމެއް ވިދާޅެއް ނުވެއެވެ. އެހެން ނަމަވެސް ނިޒާރު ވަނީ އެވާހަކަ ހުވާކުރެއްވުމަށް ފަހު ވެސް ވިދާޅުވާނެ ކަމަށެވެ.
"އަޅުގަނޑު ހުވާކޮށްފައި ބުނާނަން އައްޑޫ ސިޓީގެ ފިހާރަތަކުގައި ރަޖިސްޓްރީ ކުރެވިފައި ހުރި ފިހާރަތަކުގައި މަސްތުވާތަކެތި އެބަވިއްކާ. ޖީއެސްޓީއަށް ރަޖިސްޓްރީކޮށްގެން އެއީ ނިވާފަތްގަނޑަކަށް ހަދައިގެން އެތަންތަނުން ހަކުރު އެބަވިއްކާ"
ނިޒާރު ވިދާޅުވި ގޮތުގައި އަމާން ކަމުގެ ވާހަކަ ދައްކާއިރު އައްޑޫގެ ފިހާރަތަކުން މަސްތުވާތަކެތި ވިއްކަމުން ދަނީ އެބޭފުޅާގެ "ލޯމަތިން" ކަމަށެވެ.
ނިޒާރު ތުހުމަތުކުރެއްވި ގޮތުގައި މިކަން މިހިހސާބަށް ދާން ޖެހުނީ ރައީސް ޔާމީން ސިޔާސީ މީހުންނަށް ކޮންސެންޓްރޭޓް ކޮށް އެމީހުންނާ ދިމާކުރަން ފެށި ހިސާބުން ކަމަށެވެ.