އައްޑޫ ހިތަދު އަށް ނިސްބަތްވެ ވަޑައިގަންނަވާ ޕްރޮފެސަރު ހަސަން އުގައިލް އިނގިރޭސިވިލާތުގެ ރަށްވެހިކަން ދޫކޮށްލަން ނިންމަވައިފި އެވެ.
ފޭސްބުކްގައި ކުރެއްވި ޕޯސްޓެއްގައި ޕްރޮފެސަރ އުގެއިލު ވަނީ އެކަން އިއުލާން ކުރައްވާފައެވެ.
ޕްރޮފެސަރު އުގައިލްގެ ފޭސްބުކްގައި މިއަދު ވިދާޅުވެފައިވާ ގޮތުގައި ވޭތުވެ ދިޔަ 15 އަހަރު ހިފަހައްޓަވަމުން ގެންދެވި އިނގިރޭސި ރަށްވެހިކަން ދޫކޮށްލަން ވަރަށް އަވަހަށް ހުށަހަޅުއްވާނެއެވެ.
އިނގިރޭސި ރަށްވެހިކަން ދޫކޮށްލަން ނިންމަވާފައިވާ ކަން ހާމަކުރައްވައި އުގެއިލް ވިދާޅުވެފައި ވަނީ "ހަމައެކަނި ދިވެހި ރައްޔިތަކަށްވުމަށް ފަހުރުވެރިވާ" ކަމަށެވެ.
ޕޮރެފެސަރ އުގެއިލް އިނގިރޭސި ރަށްވެހިކަން ދޫކޮށްލައްވަން ނިންމަވާފައި ވާއިރު އެބޭފުޅާ ރާއްޖޭގެ ވެރިކަމަށް ވަޑައިގަތުމަށް ބައެއް ސިޔާސީ ފަރާތްތަކުން ވެސް ގޮވާލާފައިވެއެވެ.
އެހެން ނަމަވެސް އުގެއިލްއަށް ވެރިކަމަށް ކުރިމަތި ނުލެވޭނެ ފަދަ އިސްލާހެއް ސަރުކާރުގެ ފަރާތުން ވަނީ މަޖިލީހަށް ހުށަހަޅާފައެވެ. އެ އިސްލާހުގައިވާ ގޮތުން ރިޔާސީ އިންތިހާބުގައި ވާދަ ކުރެވޭނީ އެހެން ގައުމެއްގެ ރަށްވެހިކަން އޮންނަ މީހަކު އެ ރަށްވެހިކަން ދޫކޮށްލާތާ 10 އަހަރު ފަހުންނެވެ. އެ އިސްލާޙު މަޖިލީހުން އަދި ފާހެއް ނުކުރެއެވެ.