މިފަހަރުގެ ވޯލްޑްކަޕްގައި އެންމެ ބާރަށް ދެކެވޭ ވާހަކައަކީ ރޮނާލްޑޯ އާއި މެސީ އަށް ވޯލްޑްކަޕެއް ކާމިޔާބު ނުކުރެވި ކެރިއަރު ނިންމާލަން ޖެހިދާނެތީ އެވާހަކައެވެ. މީޑިޔާތަކުގެ ފަލަ ސުރުޚީން ޖާގަ ނުލިބުނު ނަމަވެސް މިއީ ދެން ވޯލްޑްކަޕެއްގައި ކުޅުމުގެ ފުރުސަތު ނުލިބޭނެ އަދި ވޯލްޑްކަޕަކުން ނުފެންނާނެ ކުޅުންތެރިންނެވެ.
އަންދްރޭ އިނިއެސްޓާ
ދުނިޔޭގައި އުފެދުނު އެންމެ މޮޅު އެއް މިޑްފީލްޑަރު ކަމަށް ގިނަ ބަޔަކު ޤަބޫލުކުރާ ސްޕެއިންގެ އަންދްރޭ އިނިއެސްޓާ ވަނީ އޭނާގެ ރިޓަޔަރމަންޓް އިއުލާންކޮށްފައެވެ. ސްޕެއިން ގައުމީ ޓީމާ އެކު 2010 ވަނަ އަހަރުގެ ވޯލްޑް ކަޕް އަދި 2008 ވަނަ އަހަރާއި 2012 ވަނަ އަހަރު ޔޫރޯ ކާމިޔާބުކޮށްފައިވާ އިނިއެސްޓާގެ ހުނަރުތަކާއި މޮޅެތި ޕާސްތައް ދެން ވޯލްޑްކަޕަކުން ފެނިގެން ނުދާނެއެވެ.
ޖެރާޑް ޕީކޭ
2008-2012 އާ ދެމެދު ސްޕެއިނުން ދުނިޔޭގެ ފުޓްބޯޅައިގައި ރަސްކަން ކުރިއިރު އެ ޓީމުގެ އެންމެ މުހިއްމު ކުޅުންތެރިޔަކަށް ހުރި ޑިފެންޑަރު ޖެރާޑް ޕީކޭގެ އެންމެ ފަހު ވޯލްޑްކަޕަށް ވެދާނެއެވެ. މިފަހަރުގެ ވޯލްޑްކަޕް ފެށުމުގެ ކުރިން ޕީކޭ ވަނީ، މުބާރާތަށް ފަހު ޤައުމީ ޓީމަށް ކުޅުން ހުއްޓާލާނެ ކަމުގެ އިޝާރާތެއް ކޮށްފައެވެ. އެހެން ނަމަވެސް އަދި އޭނާ ރިޓަޔަރމަންޓް އިއުލާންކޮށްފައެއް ނުވެއެވެ. ނަމަވެސް 2022 ވަނަ އަހަރުގެ ވޯލްޑްކަޕް ބާއްވާއިރު ޕީކޭގެ އުމުރުން 35 އަހަރު ވާނެތީ އޭނާ ދެން ވޯލްޑްކަޕަކުން ފެނުމުގެ ފުރުސަތު ކުޑައެވެ.
ޑޭވިޑް ސިލްވާ
ސްޕެއިންގެ "ރަން ޖީލަށް" ނިސްބަތްވާ ސިލްވާ އަށް މިފަހަކަށް އައިސް އޭނާގެ ކުރީގެ ކުޅުން ނުދެއްކެއެވެ. އެހެންވެ ސިލްވާގެ ކުޅުމަށް މިހާރު ވެސް ގިނަ ބައެއްގެ ފާޑުކިޔުންތައް އަމާޒުވެފައިވާއިރު، 2022 ވަނަ އަހަރުގެ ވޯލްޑްކަޕް އަންނަން ވާއިރު އޭނާގެ އުމުރުން 36 އަހަރު ވާނެއެވެ. އެހެންވެ މިއީ އޭނާގެ ވެސް ފަހު ވޯލްޑްކަޕަށް ވުމުގެ ފުރުސަތު ބޮޑެވެ.
ހާވިއޭ މަޝަރާނޯ
އާޖެންޓީނާގެ ޤައުމީ ޓީމަށް މިހާތަނަށް އެންމެ ގިނަ މެޗް ކުޅެފައިވާ މަޝެރާނޯ ވަނީ އޭނާ ޤައުމީ ޓީމުން ރިޓަޔާކޮށްފައިޥާ ކަން އިއުލާންކޮށްފައެވެ. ރަޝިޔާގައި މިހާރު ކުރިއަށްދާ ވޯލްޑްކަޕަކީ މަޝެރާނޯގެ ކުޅުން ފެންނާނެ އެންމެ ފަހުގެ ވޯލްޑްކަޕެވެ.
ޕެޕޭ
ޕޯޗުގަލްގެ ޑިފެންސްގެ ދިފާޢުގެ އެންމެ މުހިއްމު ކުޅުންތެރިޔާ ކަމުގައިވާ ޕޭޕޭގެ އުމުރުން 35 އަހަރު ވެފައިވާއިރު އޭނާ ދެން ވޯލްޑްކަޕެއްގައި ފެނިދާނެ ކަމަށް ޤަބޫލެއް ނުކުރެވެއެވެ. ގަތަރުގައި 2022 ވަނަ އަހަރުގެ ވޯލްޑްކަޕް ބާއްވާއިރު ޕޭޕޭގެ އުމުރުން 39 އަހަރު ވާނެއެވެ. އެހެންވެ އޭނާ ދެން ވޯލްޑްކަޕަކުން ފެނުމުގެ ފުރުސަތު ކުޑަކަމަށް ތަޖުރިބާކާރުން ބުނެއެވެ.
ރަފާ މާކުއޭޒް
އުމުރުން 39 އަހަރުގެ ރަފާ މާކުއޭޒް މިފަހަރުގެ ވޯލްޑްކަޕްގައި ކުޅޭތީ އެކަން ގިނަ ބަޔަކު ސިފަކުރަނީ އަޖައިބެއްގެ ގޮތުގައެވެ. އެހެން ނަމަވެސް އެފަދަ އިތުރު އަޖައިބެއްގެ ގޮތުގައި އޭނާ ދެން ވޯލްޑްކަޕަކުން ފެންނާނެ ކަމަކަށް ނުބެލެވެއެވެ.
މާރިއޯ ގޯމޭޒް
އުމުރުން 32 އަހަރުގެ ފޯވާޑަކީ ޖަރުމަނާއި އެކު ގިނަ ކާމިޔާބީތައް ހޯދާފައިވާ ކުޅުންތެރިއެކެވެ. އެހެން ނަމަވެސް އޭނާ އަށް ފަހަކަށް އައިސް އޭނާއަށް ޖަރުމަނުގެ ޖޯޒީގައި އެކަށީގެންވާ ކުޅުމެއް ނުދެއްކެއެވެ. އަދި ގަތަރުގައި 2022 ވަނަ އަހަރު ވޯލްޑްކަޕް ބާއްވާއިރު އޭނާގެ އުމުރުން 37 އަހަރު ވާނެތީ، އަދި ޖަރުމަނުގައި ޒުވާން ހުނަރުވެރި ކުޅުންތެރިން ތިބުމުން މިއީ އެނާގެ ފަހު ވޯލްޑްކަޕެވެ.
ރިކާޑޯ ކުއަރެސްމާ
ފައިގެ އަރިމަތިން ކުއަރެސްމާ ފޮނުވާލާ ހިތްގައިމު ބޯޅަތަކުގެ ޖާދޫ މިފަހަރުގެ ވޯލްޑްކަޕްގައި ވެސް އޭނާ ވަނީ ދައްކާލާފައެވެ. އެހެން ނަމަވެސް އުމުރުން މިހާރު 34 އަހަރުގެ ކުޅުންތެރިޔާގެ ފަރާތުން އެ ހުނަރު ދެން ވޯލްޑްކަޕަކުން ފެންނާނެ ކަމަކަށް ނުބެލެވެއެވެ. ކުއަރެސްމާ ޕޯޗުގަލް ޓީމަށް ކުޅުން ހުއްޓާލާނެ ވާހަކަ މީޑިޔާތަކުގައި ކޮންމެވެސް ވަރަކަށް ދެކެވުނު ނަމަވެސް އޭނާ އެކަން ރަސްމީކޮށް އިއުލާންކޮށްފައެއް ނުވެއެވެ.
ފަލްކާއޯ
ކޮލަމްބިޔާގެ ފުޓްބޯޅަ ޓީމަށް އެންމެ ގިނަ ގޯލް ކާމިޔާބުކޮށްދީފައިވާ މި ކުޅުންތެރިޔާ އަށް އަނިޔާ އާއި ހުރެ 2014 ވަނަ އަހަރުގެ ވޯލްޑްކަޕްގައި ނުކުޅެވުނު ނަމަވެސް މިފަހަރުގެ ވޯލްޑްކަޕްގައި ކޮލަމްބިޔާ އިން ހޯދި ކާމިޔާބީތަކުގައި އޭނާގެ ދައުރު ބޮޑެވެ.