ރެއާލް މެޑްރިޑަށް ކުޅެމުން އަންނަ ޕޯޗުގަލްގެ ތަރި ކްރިސްޓިއާނޯ ރޮނާލްޑޯ މިހާރު ވެސް ޔުވެންޓަސްއަށް ސޮއިކޮށްފައިވާ ކަމަށް ބެލެވޭ ކަމަށް އެ ކްލަބްގެ ކުރީގެ ސީއީއޯ ލޫސިއާނޯ މޮގީ ބުނެފި އެވެ.
މޮގީ ޔުވެންޓަސްގެ ސީއީއޯއަކަށް ހުރެ ރޮނާލްޑޯގެ އެންމެ ޒުވާން އުމުރުގައި އޭނާ އެ ކްލަބަށް ގެންނަން މަސައްކަތް ކުރިއެވެ. އެހެން ނަމަވެސް އެ މަސައްކަތް ކާމިޔާބު ވެފައެއް ނުވެއެވެ.
1994 ވަނަ އަހަރުން ފެށިގެން 2006 ވަނަ އަހަރާއި ހަމައަށް ޔުވެންޓަސްގައި މަސައްކަތް ކުރި މޮގީ މިހާރު ހުރީ އުމުރަށް ފުޓްބޯޅަ ހަރަކާތްތަކުން ސަސްޕެންޑްކޮށްފައެވެ. އޭނާ ސަސްޕެންޑް ކުރީ އިޓަލީ ފުޓްބޯޅައިގެ ބޮޑު ކޮރަޕްޝަނުގެ މައްސަލަ ގަނޑުގެ ތެރޭގައެވެ.
"އަހަރެންގެ ނަޒަރުގައި އޭނާ (ރޮނާލްޑޯ) މިހާރު ވަނީ މިއުނިކްގައި ޔުވެންޓަސް އާއި އެކު އެގްރީމަންޓެއްގައި ސޮއިކޮށް އަދި މެޑިކަލް ޓެސްޓުން ވެސް ފާސްވެފައި." މޮގީ ބުންޏެވެ.
ރެއާލް މެޑްރިޑްގެ ތާރީހުގައި ވެސް އެންމެ ގިނަ ލަނޑު ޖަހައިދިން ރޮނާލްޑޯ ވަނީ އެޓީމަށް ގިނަ ކާމިޔާބީތަކެއް ހޯދައިދީފައެވެ.