ކުރީގެ ރައީސް މުހައްމަދު ނަޝީދަކީ އެމްޑީޕީއަށް ލިބިފައި ހުރި "ރަންގަނޑެއްހާ އަގުބޮޑު އެސެޓެއް" ކަމުގައި ހިތަދޫ ދެކުނު ދާއިރާގެ މަޖިލިސް މެންބަރު އަލީ ނިޒާރު ވިދާޅުވެއްޖެއެވެ.
ސަންގު ޓީވީގެ ޕްރޮގްރާމެއްގައި ވާހަކަ ދައްކަވަމުން ނިޒާރު ވިދާޅުވި ގޮތުގައި ނަޝީދަކީ، އެމްޑީޕީ އަށާއި ރާއްޖޭގެ ޑިމޮކްރެޓިކް ޕްރޮސެސް އަށް ލިބިފައި ހުރި ހަމަ އަގު ވަޒަން ނުކުރެވޭ ވަރުގެ އަގުހުރި މުދަލެކެވެ.
"އަޅުގަނޑުމެންނަށް ހަމަ ރަންގަނޑެއްހާ އަގުބޮޑު އެސެޓެއް، އެމްޑީޕީ އަށް ލިބިފައިވާ އަދި މި ޑިމޮކްރެޓިކް ޕްރޮސެސް އަށް ލިބިފައި ހުރި ހަމަ އަގު ވަޒަން ނުކުރެވޭ ވަރުގެ އަގުހުރި މުދަލެއް" ކުރީގެ ރައީސް މުހައްމަދު ނަޝީދު އާއި ބެހޭގޮތުން ނިޒާރު ވިދާޅުވިއެވެ.
މި މޭރުމުން ވާހަކަ ދައްކަވަމުން ނިޒާރު ވިދާޅުވި ގޮތުގައި އެވަރުގެ ބޭފުޅަކު ރާއްޖޭގެ ސިޔާސީ މަސްރަޚުން އަދި އެމްޑީޕީން ވެސް ބާކީ ނުކުރެވޭނެ ކަމަށެވެ.
ނަޝީދުގެ މައްޗަށް އިއްވާފައިވާ ޖަލު ހުކުމްގެ ވާހަކަ ދައްކަވަމުން ނިޒާރު ވިދާޅުވި ގޮތުގައި އެފަދަ ކަންތައް ކުރަނީ ސަރުކާރުން އެމަނިކުފާނު ދެކެ ޖެހިލުން ވާތީ ކަމަށެވެ.