ތައިލެންޑުގެ ހޮހަޅައިގައި ތާށިވި ކުދިން ސަލާމަތް ކުރުމުގެ މަސައްކަތުގައި އުޅުނު ޑައިވަރަކު މަރުވެއްޖެއެވެ.
ތައިލެންޑްގެ އޮފިޝަލުންނާއި ހަވާލާދީ ސީއެންއެންގައި ރިޕޯޓްކޮށްފައިވާ ގޮތުގައި މަރުވެފައި ވަނީ ތައިލޭންޑްގެ ނޭވީގައި ކުރިން މަސައްކަތް ކުރި މީހެކެވެ. އޭނާ ހޮހޮޅައިގައި ތާށިވި ކުދިން ސަލާމަތް ކުރުމުގެ މަސައްކަތުގައި ބައިވެރިވެފައިވަނީ ހިލޭ ސާބަހަށެވެ.
ސާޖެންޓެއްގެ ގޮތުގައި ނޭވީގައި ކުރިން މަސައްކަތް ކުރި ސަމްރާން ކުނާން މަރުވެފައިވަނީ ކުދިން ތާށިވެފައި ތިބި ހޮހޮޅައިގައި އެކި ހިސާބުތަކުގައި އޮކްސިޖަން ޓޭންކްތަކެއް ހަރުމަށް މަސައްކަތް ކުރަމުން ދަނިކޮށެވެ.
ސީއެންއެން އިން ރިޕޯޓްކޮށްފައިވާ ގޮތުގައި ސަމްރާން މަރުވެފައި ވަނީ އޭނާގެ އޮކްސިޖަން ފުޅި ހުސްވެގެންނެވެ. އެހެން ނަމަވެސް އެކަމާއި ބެހޭ އިތުރު ތަފްސީލެއް އަދި ތައިލޭންޑްގެ ރަސްމީ ފަރާތްތަކުން ހާމަކޮށްފައެއް ނުވެއެވެ.
ހޮހަޅައިގައި ތާށިވި 12 ކުދިން ނިސްބަތް ވަނީ މޫ ޕާ ނުވަތަ ވައިލް ބޯ ފުޓުބޯޅަ ޓީމަށެވެ. އެ ކުދިން ޖޫން 23 ވަނަ ދުވަހު ކޯޗާ އެކު ހޮހަޅަ އަށް ވަދެފައި ވަނީ ފުޓުބޯޅަ ޕްރެކްޓިސް ނިންމާލުމަށް ފަހު އެވެ. ކޯޗާ އެކު އެ ކުދިން މީގެ ކުރިން ވެސް އެ ހޮހަޅަ އަށް ވަދެ އުޅެ އެވެ.
ތައި ނޭވީން ވަނީ ހޮހަޅައިގެ ތެރޭގައި ފައިބަ އޮޕްޓިކް އިންޓަނެޓް ލައިނެއް ގާއިމްކޮށް ތާށިވެފައިވާ ކުދިންނާއި އާއިލާތަކާއި ގުޅޭނެ ގޮތް ހަދާފައެވެ.