މިއީ މިއަދު ފޭސްބުކްގައި ހިތަދޫ އަށް ނިސްބަތްވާ މީހަކު ހިއްސާކުރީ ކުޑަ ވަގުތުކޮޅެއްގެ ތެރޭގައި ޕްރީސްުކޫލް ކުދިންތަކެއް ހިތަދޫގެ ފުއްޓާރު ފަރާތުން އެއްކުރި ޕްލާސްޓިކް ފުޅިތަކެއްގެ ފޮޓޯއެކެވެ.
އެ ފޮޓޯ ހިއްސާކުރަމުން އޭނާގެ މެސެޖަކީ މިއީއެވެ. "ލައިގެން ހުންނަ ހެދުމަކުން އަތުގައި އޮންނަ ޑިވައިސް އަކުން ބަލާ ފުޓްބޯޅަ މެޗަކުން ދުއްވާ ކާރަކުން 'ސިވިލައިޒް' ނުވާނެ" ކަމަށެވެ.
މުޖްތަމަޢުގެ ތެރެއިން ރައްޔިތަކު ދިން މިމެސެޖަކީ ހަމަ ހަގީގަތުގައި ވެސް ތެދު ވާހަކައެކެވެ. އެންމެ ފަހުގެ ފޯނެއް ހިފަހައްޓައިގެން ހުރެ އަތުހުރި ތަނަކަށް ކުނި އުކަމުން ދިއުމަކީ ހަގީގަތުގައި ތަހުޒީބް ވުމެއް ނޫނެވެ. އެއީ ނާތަހުޒީބުކަމެވެ.
ސްމާޓް ފޯނެއް އަތަށް ލައިގެން "ސްކްރޯލް" ކުރަމުންދާ މީހުންގެ ތެރޭގައި ތިމާވެއްޓަށް ގެއްލުން ހުރި ކަންތައް ނުކުރުމުގެ މުހިއްމު ކަން ނޭނގޭ ހަމަ އެއްވެސް މީހަކު ނުހުންނާނެއެވެ. އެތަން މިތަނަށް ކުނި އުކާލުމުގެ ގެއްލުމާއި އަދި ޕްލާސްޓިކްގެ ސަބަބުން ރާއްޖޭގެ ފަރުތަކަށް ލިބޭނެ ގެއްލުންތައް ނޭނގޭނެ ހަމަ އެކަކު ވެސް ނުހުންނާނެއެވެ.
އެހެން ނަމަވެސް ހިތާމައަކީ ޕްލާސްޓިކް ބޭނުން ކުރުން މަދު ކުރަން ކިތަންމެ ކެމްޕޭނެއް ހިންގިޔަސް އެކަން ހުއްޓާލަން ފަސްޖެހޭ ކަމެވެ. އެންމެ އަގުބޮޑުކޮށް ދުއިސައްތަ އެއްހާ ރުފިޔާއަށް ކުނި އުކާލެވެން އޮންނައިރު ވެސް އެތަން މިތަނަށް ކުނި އުކާލަމުންދާ ކަމެވެ.
ތިމާވެށި ހިމާޔަތް ކުރުމަކީ އެންމެންގެ ޒިންމާއެކެވެ. އަތުގައި އޮންނަ ފޯނާއި އެއްވަރަށް ތަހުޒީބުވެ ކޮންމެ މީހަކު ވެސް ތިމާވެއްޓަށް ގެއްލުން ހުރި ކަންތަކުން ދުރުހެލިވާންވީއެވެ.