ރިޔާސީ އިންތިޚާބު ރައީސް އަބްދުﷲ ޔާމީނަށް އެއްބުރުން ކާމިޔާބުކޮށް ދިނުމަށް މަސައްކަތް ކޮށްދިނުމަށް ރައީސް ޔާމީންގެ ރަނިން މޭޓަކަށް ހަމަޖެއްސާފައިވާ ޑރ. މުހައްމަދު ޝަހީމް އަލީ ސައީދު އެދިވަޑައިގެންފި އެވެ.
ރައީސް ޔާމީން މިގޮތަށް ވިދާޅުވެފައި ވަނީ ޑރ. ޝަހީމް ރަނިންމޭޓަކަށް ހަމަޖެއްސިކަން އިއުލާން ކުރެއްވިތާ ކުޑައިރުކޮޅެއްގެ ތެރޭގައި ކުރެއްވި ޓްވީޓެއްގައެވެ.
ޑރ.ޝަހީމްގެ ޓްވީޓްގައި ގޮވާލައްވާފައި ރައީސް ޔާމީނާއި އެކު ދިވެހި އެންމެހައި ރައްޔިތުން އެއްބައިވަންތަވުމަށެވެ.
"ރައީސް ޔާމީންގެ ފަރާތްޕުޅުގައި ދިވެހި އެންމެހައި ރައްޔިތުން އެއްބައިވަންތަވެ، އިލްމުވެރިންނާއި ޒުވާނުންނާއި ގައުމުގެ އެންމެހައި ކަނބަލުން މި އިންތިޚާބު ފުރަތަމަ ބުރުން ކާމިޔާބު ކުރުމަށް މަސައްކަތް ކުރެއްވުމަށް އެދެން،" ގއ. މާމެންދު އަށް އުފަން ޑރ.ޝަހީމް ވިދާޅުވެފައިވެއެވެ.
ޑރ. ޝަހީމް ވަނީ ރައީސް ޑރ.މުހައްމަދު ވަހީދުގެ ވެރިކަމުގައި އިސްލާމިކް މިނިސްޓަރުކަން އަދި އެމްޑީޕީގެ ވެރިކަމުގައި އެ މިނިސްޓްރީގެ ސްޓޭޓް މިނިސްޓަރުކަން ކުރައްވައިފަ އެވެ. ޕީޕީއެމްގެ ސަރުކާރުގައި ވެސް އިސްލާމިކް މިނިސްޓަރު ކަން ޝަހީމް ކުރެއްވި އިރު މިހާރު ހުންނެވީ އިސްލާމިކް ޔުނިވަސިޓީގެ ޗާންސެލަރުގެ މަގާމުގައެވެ.