ގދ. ފިޔޯރީގައި މިއަދު މޫދަށް އެރި އުޅުނު ޒުވާނަކު ގެނބިގެން މަރުވެއްޖެއެވެ. މައުލޫމާތު ލިބިފައިވާ ގޮތުގައި މަރުވެފައިވަނީ އައްޑޫ ސިޓީގެ ފޭދޫ އަށް ނިސްބަތްވާ ޒުވާނެކެވެ.
މަރުވެފައިވަނީ ފޭދޫ އަށް ނިސްބަތްވާ "ހަޒާނާ" ދޯނީގައި މަހަށް ނިކުތް ޒުވާނެކެވެ. ފިޔޯރީ ކައުންސިލާ ހަވާލާދީ "އަވަސް" އިން ރިޕޯޓުކޮށްފައިވާ ގޮތުގައި މަރުވެފައިވަނީ މުހައްމަދު ސައީދު ނަމަކަށް ކިޔާ މީހެކެވެ.
ފަޅުވެރިންގެ ފަރާތުން މައުލޫމާތު ލިބުނު ގޮތުގައި މުހައްމަދު ސައީދު މޫދަށް ފޭބީ ފެންވަރަން ވެގެންނެވެ. އަދި މޫދަށް ފޭބިތާ ގިނައިރުތަކެއްވެ، ޚަބަރެއް ނުވެގެން ހޯދަމުން ދަނިކޮށް މުހައްމަދު ފެނިފައިވަނީ ތިރީސް ވަރަކަށް ފޫޓު އަޑީގައި މަރުވެފައިވަނިކޮށެވެ.
ފިޔޯރީ ކައުންސިލުން ބުނެފައިވަނީ މޫދުން ނެގިއިރު ވެސް މުހައްމަދު ވަނީ މަރުވެފައި ކަމަށް ލަފާ ކުރެވޭ ކަމަށެވެ. މީހާ ވަނީ މޫދުން ނެގިއިރު ނޫވެ، އަނގައިން ފޮނު ފައިބައިފައި ކަމަށްވެސް މައުލޫމާތު ލިބިފައިވެއެވެ.