ގުޅިފައިވާ އިދިކޮޅު އިއްތިހާދުން ސެޕްޓެމްބަރު މަހުގައި ބާއްވާ ރިޔާސީ އިންތިޚާބުގައި ރިޔާސީ ކެންޑިޑޭޓެއްގެ ގޮތުގައި ނެރުމަށް ކަނޑައަޅާފައިވާ އިބްރާހިމް މުހައްމަދު ސޯލިހް(އިބޫ) މިއަދުގެ ވަގުތެއްގައި ޖޭޕީގެ އިސް ބައެއް ބޭފުޅުންނާއި ބައްދަލު ކުރައްވައިފިއެވެ.
އިބޫ ޖޭޕީގެ ލީޑަޝިޕާއި ބައްދަލުކުރައްވާފައިވަނީ ޖޭޕީން އިންތިޚާބަށް ނެރޭ ރަނިންމޭޓަކު މިއަދު ކަނޑައަޅައި، އެކަން އިއުލާން ކުރައްވާނެ ކަން ހާމަކޮށްފައިވަނިކޮށެވެ. ޖޭޕީގެ ބައެއް އިސްވެރިންނާ ހަވާލާދީ "ވީނިއުސް" އިން ރިޕޯޓުކޮށްފައިވާ ގޮތުގައި އިބޫއާއި އެކު ބޭއްވި ބައްދަލުވުމަކީ ބިނާކުރުވަނިވި ކާމިޔާބު ބައްދަލުވުމެކެވެ.
މިބައްދަލުވުމުގައި ޖޭޕީގެ ލީޑަރ، އޮނަރަބަލް ގާސިމް އިބްރާހިމްގެ މަސްއޫލިއްޔަތުތައް ހަވާލުކޮށްފައިވާ ޑރ. ހުސެއިން ރަޝީދު ހަސަން އާއި ޕާޓީގެ ބައެއް ނައިބު ލީޑަރުން ބައިވެރިވެފައިވެއެވެ.
ނަމަވެސް ބައްދަލުވުމާއި ގުޅޭގޮތުން އިތުރު އެއްވެސް ތަފްސީލެއް ޖޭޕީން ހާމަކޮށްފައި ނުވިނަމަވެސް އިބޫގެ މި ކުއްލި ބައްދަލުވުމަކީ މިއަދު އިއުލާން ކުރާ ރަނިންމޭޓާ ގުޅުން ހުރި ބައްދަލުވުމެއް ކަމަށް ބެލެވެއެވެ.
ރަނިންމޭޓާ މެދު އެމްޑީޕީއާއި ޖޭޕީގެ އާންމު މެމްބަރުންނާ ދެމެދު ޚިޔާލު ތަފާތުވުންތައް އުފެދިފައިވި ނަމަވެސް އެމްޑީޕީން މައުލޫމާތު ދޭ ގޮތުގައި ޖޭޕީން ރަނިންމޭޓަކަށް ނެރޭނީ ހުރިހާ ޕާޓީއަކުން ވެސް ބަލައިގަންނާނެ ބޭފުޅެއް ކަމަށް ޖޭޕީގެ ލީޑަރު ގާސިމް އިބްރާހިމް ވަނީ ވިދާޅުވެފައެވެ.