އައްޑޫގައި ހަދާފައިވާ އިކްޓޯރިއަލް ކޮންވެންޝަން ސެންޓަރު (އީސީސީ) އާއި އެ ސަރައްހަދުގައި އަމިއްލަ ވިޔަފާރި ތަރައްގީ ކުރުމަށް ހުޅުވާލި ފުރުސަތުގައި 10 ފަރާތަކުން ޝައުގުވެރިކަން ފާޅުކޮށްފައިވާ ކަމަށް އިކޮނޮމިކް މިނިސްޓްރީން ބުނެފި އެވެ.
މިނިސްޓަރު އަހުމަދު މުހައްމަދު ވިދާޅުވީ ކޮންވެންޝަން ސެންޓަރާއި އެ ސަރައްހަދުގައި އަމިއްލަ ވިޔަފާރި ތަރައްގީ ކުރުމަށް ވިއަސް އަދި ޓުއަރިޒަމާ، ތައުލީމް، އަދި ހެލްތް ދާއިރާއާ ގުޅުންހުރި މުއާމަލާތެއް ހިންގުމަށް ވިއަސް ކުއްޔަށް ދިނުމަށް އެޕްރީލް މަހުގެ 2 ވަނަ ދުވަހު ފުރުސަތު ހުޅުވާލުމުން ގިނަ ފަރާތްތަކަކުން މިކަމަށް ޝައުގުވެރިކަން ފާޅުކޮށްފައިވާ ކަމަށެވެ.
މިނިސްޓަރު ވިދާޅުވީ އިތުރު ފަރާތްތަކަކުން ވެސް މިކަމަށް އެދެމުންދާތީ ކުރިމަތިލުމުގެ މި މުއްދަތު މި މަހުގެ 22 ވަނަ ދުވަހަށް އިތުރުކޮށް ދީފައިވާ ކަމަށެވެ. އޭނާ އަދި ވިދާޅުވީ އީސީސީ އާއި އެތަން ހިމެނޭ ސަރަހައްދު ތަރައްގީ ކުރަން ޝައުގުވެރިވާ ފަރާތްތައް ހޯދުމަށް މި މަހުގެ ދެ ވަނަ ދުވަހު އިއުލާންކޮށްފައި ވަނީ އެ މިނިސްޓްރީ ޓޫރިޒަމް ގުޅިގެން ކަމަށެވެ.
އެ އިއުލާނުގައިވާ ގޮތުން އެ ސަރަހައްދު ތަރައްގީކުރަން ހަވާލުކުރާނީ އެ ސަރަހައްދުގައި ހޮޓަލެއް ހިންގުމަށް، ނޫނީ ތައުލީމީ ހިދުމަތް ދޭ ތަނެއް ހިންގުމަށް ނުވަތަ ސިއްހީ ހިދުމަތް ދޭ ތަނެއް ހިންގުމަށް ޝައުގުވެރިވާ އެންމެ ރަނގަޅު ފަރާތަކަށެވެ.
އީސީސީ ތަރައްގީ ކުރަން ހުށަހަޅާފައިވާ ފަރާތްތަކުގެ ތެރޭގައި ހުންނަން ޖެހޭ ޝަރުތުތައް ކަމަށް އިއުލާނުގައި ބުނެފައި ވަނީ އެފަދަ ޕްރޮޖެކްޓެއް ހިންގުމުގެ ތަޖުރިބާ އާއި ފަންނީ އަދި މާލީ ގާބިލްކަން ހުރި ކުންފުންޏަކަށް ވުމެވެ.
މިނިސްޓަރު ވިދާޅުވީ އީއޯއައި ހުށަހަޅާ ފަރާތްތަކުގެ ތެރެއިން އެންމެ ރަނގަޅު ޕްރޮޕޯސަލެއް ހުށަހަޅާ ފަރާތަކަށް އީސީސީ ހަވާލުކުރާނީ 50 އަހަރުގެ މުއްދަތަކަށް ކަމަށެވެ.