ރައީސް އަބްދުﷲ ޔާމީންގެ ރަނިންމޭޓު ކަމަށް އައްޔަން ކޮށްފައިވާ ކުރީގެ އިސްލާމިކް މިނިސްޓަރު އަދި އައިޔޫއެމްގެ ޗާންސެލަރު ޑރ. މުހައްމަދު ޝަހީމް އަލީ ސައީދު އެ މަގާމުން އިސްތިއުފާ ނުދެއްވުމަށް ނިންމަވައިފި އެވެ.
ރަނިންމޭޓް ކަމަށް އައްޔަން ކުރުމުން ކުރިން ޝަހީމް ޔުނިވާސިޓީގެ ޗާންސެލަރުގެ މަގާމުން އިސްތިއުފާ ދެއްވާނެ ކަމަށް އިއުލާން ކުރި ނަމަވެސް މިހާރު އޭނާ ވަނީ ޗާންސެލަރުގެ މަގާމުގައި ދެމިހުރުމަށް ރައީސް އަބްދުﷲ ޔާމީން އެމަނިކުފާނުގެ ކައިރިން އެދިވަޑައިގެންފައިވާ ކަމަށް ވިދާޅުވެފައެވެ.
އަދި ރައީސް އެގޮތަށް އެދިވަޑައިގެންނެވުމުން ޔުނިވާސިޓީގެ ޗާންސެލަރުގެ މަގާމު ދޫނުކުރުމަށް ނިންމާފައިވާ ކަމަށް ޝަހީމް ވިދާޅުވިއެވެ. ރައީސް ޔާމީންގެ ރަނިންމޭޓަކަށް ޝަހީމް ހަމަޖެއްސުމުން އިދިކޮޅު ފަރާތްތަކުން ވަނީ މަގާމު ސިޔާސީ ނުކުރުމަށް މަގާމުން އިސްތިއުފާ ދެއްވުމަށް ގޮވާލާފައެވެ.
ޑރ. ޝަހީމާއެކު ރާއްޖޭގެ ބައެއް ދީނީ އިލްމުވެރިން ވެސް ރައީސް ޔާމީނަށް ތާޢީދު ކުރަން ނިންމާފައިވާއިރު ބައެއް އިލްމުވެރިން ވަނީ ޝަހީމްގެ ނިންމުމަށް ފާޑުކިޔާފައެވެ.