އައްޑޫ ސިޓީ ކައުންސިލް އިދާރާ ހިންގާ އިމާރާތް ސަރުކާރަށް ނަގަން ނިންމައިފިއެވެ.
'އައްޑޫލައިވް' އާއި ވާހަކަ ދެއްކި ސަރުކާރުގެ އިސް އޮފިޝަލަކު ބުނިގޮތުގައި ކައުންސިލް އިދާރާ ހިންގަމުން އަންނަ އިމާރާތް ސަރުކާރަށް ނަގަން ނިންމައި އެކަން ވަރަށް އަވަހަށް އެ އިދާރާއަށް އަންގާނެ ކަމަށެވެ. އެހެން ނަމަވެސް އެ އިދާރާ ނަގާ ބޭނުމެއް އޭނާ ވިދާޅެއް ނުވެއެވެ.
އައްޑޫ ސިޓީ ކައުންސިލްގައި ތިއްބަވަނީ މުޅިން ވެސް އެމްޑީޕީ އަށް ނިސްބަތްވާ ކައުންސިލަރުންނެވެ. އެހެންވެ އަބަދުވެސް ސިޔާސީ ގޮތުން ހަލަބޮލިވާ ދަނޑިވަޅުތަކުގައި ކައުންސިލްގެ މެންބަރުންނަށް ސަރުކާރުގެ ފަރާތުން އެކި ފިޔަވަޅުތައް އަޅައެވެ.
ކައުންސިލް އިދާރާ ހިންގާ އިމާރާތް ސަރުކާރުގެ ބޭނުމަކަށް ނަގަން ނިންމާފައި ވާއިރު މި ސަރުކާރުން ވަނީ އައްޑޫ ސިޓީ ކައުންސިލްގެ ގިނަ ބާރުތަކެއް އަތުލާފައެވެ. ލާމަރުކަޒީ ގާނޫނަށް އިސްލާހުތަކެއް ގެނެސް ކައުންސިލްގެ ބާރުތައް ދިނީ އައްޑޫގައި ގާއިމްކޮށްފައިވާ ހައުސިން މިނިސްޓްރީގެ ޑިޕާޓްމަންޓަށެވެ.
2015 ވަނަ އަހަރު ގެނައި އިސްލާހުތަކާއި އެކު އައްޑޫގެ ބިންތަކާއި ޕާކުތައް އަދި ބަނދަރުތަކުގެ އިތުރުން މަގުތައް ބެލެހެއްޓުން ވެސް ވަނީ ހައުސިން މިނިސްޓްރީގެ ބެލުމުގެ ދަށަށް ގެންގޮސްފައެވެ.
އޭގެ ފަހުން އައްޑޫ ސިޓީ ކައުންސިލުން ބަލަހައްޓަމުން އައީ ހަމައެކަނި ވިހައި މަރުވާ މީހުންގެ ރެކޯޑާއި ރަށްވެހިންގެ ރަޖިސްޓްރީ ބެލެހެއްޓުމެވެ. އެހެން ނަމަވެސް އެކަން ވެސް މީގެ ވަރަށް ފަހުން ވަނީ ހައުސިން މިނިސްޓްރީ އަށް ބަދަލުކޮށްފައެވެ.