ދިއްގަރު ދާއިރާގެ މަޖިލިސް މެންބަރު ކަމަށް ފާރިސް މައުމޫނު އިންތިޚާބު ކުރުމަކީ ޕީޕީއެމް އަށް ލިބުނު އެންމެ ބޮޑު ގެއްލުން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، މިއަދު ދިއްގަރަށް ވަޑައިގެން އެރަށު ރައްޔިތުންނާއި މުޚާތަބު ކުރައްވައި ވާހަކަ ދައްކަވަމުންނެވެ.
"މި (ދިއްގަރު)ދާއިރާގެ މެންބަރު ކަމަށް ފާރިސް ނެގުމަކީ އަޅުގަނޑުމެން ޕާޓީއަށް ލިބުނު އެންމެ ބޮޑު ގެއްލުން"
ދިއްގަރުގެ ރައްޔިތުން އަބަދުވެސް އެކަން ހަނދާނުގައި ބަހައްޓަވަން ވާނެ ކަމަށެވެ. ރައީސް ޔާމީން ވިދާޅުވީ އެވާހަކަ ދައްކަވަން ފަސޭހަ ނޫން ކަމަށާއި އެހެން ނަމަވެސް އެމަނިކުފާނަކީ ދުނިޔޭގެ ހަގީގަތާއި "އަޅުގަނޑުމެންގެ ހަގީގަތާއި އެއްގޮތަށް ވާހަކަ ދައްކަން ބޭނުންވާ މީހެއް" ކަމަށެވެ.
ދިއްގަރުގައި ވާހަކަ ދައްކަވަމުން ފާރިސް އަށް ވަރަށް ބޮޑަށް ފާޑުވިދާޅުވަމުން ރައީސް ޔާމީން ވަނީ ފާރިސް މަޖިލީހަށް ހޮވުމަށް ވަރަށް މަސައްކަތް ކުރެއްވި ކަމަށް ވެސް ވިދާޅުވެފައެވެ.
އަދި ފާރިސް މަޖިލީހުގެ ތެރެއިން ޤާނޫނާއި ޚިލާފަށް ކުރެވުނު މަސައްކަތްތަކުގެ ތެރޭގައި އިސްކޮށް ހުންނެވި ކަމަށް ވެސް ރައީސް ޔާމީން ވަނީ ތުހުމަތު ކުރައްވާފައެވެ. އެގޮތުން ރައީސް ޔާމީން ވިދާޅުވި ގޮތުގައި ޕީޕީޢެމް އަށް ކުރިމަތިވި ހުރިހާ "ހީނަރުކަމެއްގެ ފަހަތުގައި ހުންނެވީ" ވެސް ފާރިސް ކަމަށެވެ.