އިދިކޮޅު އިއްތިހާދުގެ ފަރާތުން ރިޔާސީ އިންތިޚާބުގައި ވާދަކުރައްވާ އިބްރާހިމް މުހައްމަދު ސޯލިޙް(އިބޫ) ހުޅުމާލެއަށް ވަޑައިގެންނެވުމުން އެބޭފުޅާއަށް ހަމަލާދޭން މަސައްކަތް ކުރުމަކީ ފިނޑި އަމަލެއް ކަމުގައި ގަލޮޅު ދެކުނު ދާއިރާގެ މެންބަރު އަހްމަދް މަހްލޫފް ވިދާޅުވެއްޖެއެވެ.
އިބޫ އަށް ހަމަލާދޭން މަސައްކަތް ކުރި ވީޑިއޯ އަކާއި އެކު ކުރެއްވި ޓްވީޓެއްގައި މަހްލޫފް ވިދާޅުވީ، "ވާދަވެރި ކެންޑިޑޭޓަށް ހަމަލާދޭން ކުދިން ފޮނުވުމަކީ ވަރަށް ފިނޑި އަމަލެއް" ކަމަށެވެ.
"ޑިކްޓޭޓަރު ޔާމީން ބަޑި ހިފައިގެން ރަށްރަށަށް އަރާފަ، ވާދަވެރި ކެންޑިޑޭޓަށް ހަމަލާދޭން ކުދިން ފޮނުވުމަކީ ވަރަށް ފިނޑި އަމަލެއް" މަހްލޫފް ވިދާޅުވިއެވެ.
މަހްލޫފް އިތުރަށް ވިދާޅުވެފައިވާ ގޮތުގައި ފާއިތުވި 4 އަހަރު އިދިކޮޅު ފަރާތްތަކުން އުޅުނީ ބިރުވެރިކަމާއި އަނިޔާގެ ތެރޭގައި ކަމަށެވެ. އެހެންވެ އިބޫއަށް ހަމަލާދޭން މަސައްކަތް ކުރި ނަމަވެސް އެބޭފުޅާ ފަހަތަށް ޖެހިވަޑައި ނުގަންނަވާނެ ކަމަށެވެ.
ހުޅުމާލޭ ސެންޓްރަލް ޕާކް ކައިރިން އިބޫ ހިންގަވާފައި ދަނިކޮށް އެބޭފުޅާ އަށް ހަމަލާދޭން މަސައްކަތް ކުރީ ސައިކަލުގައި އައި ދެ މީހެކެވެ. އެހެން ނަމަވެސް އެމީހުން އިބޫ އަށް ހަމަލާދޭން އުޅުމުން ސެކިއުރިޓީން ވަނީ އެކަމަށް ހުރަސް އަޅައި އިބޫ އެ ސަރަހައްދުން ގެންގޮސްފައެވެ.