އައްޑޫ ސިޓީ ހިތަދޫ ރީޖަނަލް ހޮސްޕިޓަލުގެ ޚިދުމަތްތަކުގެ ފެންވަރު ދަށްވެގެން ރައްޔިތުން ޝަކުވާ ކުރަން ފަށާއިރަށް އެކަން "އޮއްބާލުމަށް" ހޮސްޕިޓަލުގެ ވެރިންނާއި ސަރުކާރުގެ ސިޔާސީ މަގާމުތަކުގައި ތިއްބަވާ ބޭފުޅުން މޮޅު ވާހަކަތައް ދައްކަވައެވެ. އެގޮތުން 2017 ވަނަ އަހަރުގެ ޖެނުއަރީ މަހުގެ ތެރޭގައި ހިތަދޫ ހޮސްޕިޓަލުން ދެއްކި އެފަދަ ވާހަކަ އަކީ އެ ހޮސްޕިޓަލުގައި ކަށީގެ އޮޕަރޭޝަން ކުރަން ފަށަން އުޅޭ ވާހަކައެވެ.
ދައުލަތުގެ މީޑިޔާ ޕީއެސްއެމް އަށް ދިން އިންޓަވިއުއެއްގައި ހޮސްޕިޓަލް ހިންގެވުމާއި އޭރު ހަވާލުވެ ހުންނެވި، ޑިރެކްޓަރ ޝަހު ސަޢީދު ވިދާޅުވި ގޮތުގައި "ކަށީގެ އޮޕަރޭޝަންތައް ފެށުމަށް ބޭނުންވާ ބޮޑެތި އިކުއިޕްމަންޓްސްތައް" އޭރު ވަނީ ހޯދައި ނިމިފައެވެ.
"ބޮޑެތި މެޝިންތައް ގެނެސް އިންސްޓޯލް ކުރުމުގެ މަސައްކަތް މިހާރު ކުރިއަށް މިދަނީ. މިހާރު ކުދި ކޮންސިއުމަބަލްސް ހޯދުމުގެ މަސައްކަތް ކުރިއަށް އެބަދޭ. އެކަން ނިމުނުހާ އަވަހަށް ފެށޭނެ. މިކަމުގައި މިނިސްޓްރީއާއި، އެސްޓީއޯގެ އެހީ ވަރަށް ބޮޑު" 2017 ވަނަ އަހަރުގެ ޖެނުއަރީ 28 ވަނަ ދުވަހު ޕީއެސްއެމްއަށް ދިން އިންޓަވިއު އެއްގައި ހިތަދޫ ރީޖަނަލް ހޮސްޕިޓަލްގެ ޑިރެކްޓަރ ޝަހު ސަޢީދު ވިދާޅުވެފައިވެއެވެ.
ހިތަދޫ ހޮސްޕިޓަލުގައި ކަށީގެ އޮޕަރޭޝަންތައް ފަށަން އުޅޭކަމަށް ބުނިތާ 1 އަހަރާއި 5 މަސް ވެގެން ދާއިރު އެކަން ފެށޭ މަންޒަރެއް ނުފެނެއެވެ. އަދިވެސް ކަށީގެ އޮޕަރޭޝަން ފެށުމަށް ބޭނުންވާ "ކުދި ކޮންސިއުމަބަލްސް ހޯދުމުގެ މަސައްކަތް" ކުރިއަށް ދަނީ ކަމަށް ވެދާނެއެވެ.
ކަށީގެ އޮޕަރޭޝަންތައް ފެށުމާއި ގުޅޭގޮތުން ހޮސްޕިޓަލުން އެއްވެސް އެއްޗެއް މިފަހުން ހާމަކޮށްފައި ނުވާއިރު، އެތަނުން އެކްސްރޭ ނުނެގޭތާ 2 މަސް ދުވަސް ވަނީ ވެފައެވެ. އަދި އެ މައްސަލަ ހައްލުކުރެވޭނެ ދުވަހެއް ބުނަން ވެސް ހޮސްޕިޓަލުން ވަނީ ދެކޮޅު ހަދާފައެވެ.