ހުޅުގެ ބަލިތަކަށާއި ކުޅިވަރު ކުޅެގެން ލިބޭ އަނިޔާތަކަށް ފަރުވާ ދިނުމަށް ޚާއްޞަ ޑޮކްޓަރެއް އެމްއެންޑީއެފްގެ ސެނަހިޔަ ހޮސްޕިޓަލަށް ގެނެސްފި އެވެ.
މިއަދާއި މާދަމާ ހުޅުގެ ބަލިތަކަށާއި ކުޅިވަރު ކުޅެގެންލިބޭ އަނިޔާތަކަށް ފަރުވާ ދިނުމަށް ހަމަޖެހިފައި ވަނީ، ސްރީލަންކާގެ ނަވަލޯކާ ހޮސްޕިޓަލްގައި މަސައްކަތް ކުރައްވާ، ސްރީލަންކާގެ ޤައުމީ ކްރިކެޓް ޓީމްގެ ސްޕޯޓްސް ޑޮކްޓަރު ޑރ. ހަރިންދު ތިސަރަ ވިޖޭ ސިންގް ކަމަށް ސެނަހިޔައިން މަޢުލޫމާތު ދެ އެވެ.
އަދި މިއީ 2013 އޭޕްރީލް 21 ވަނަ ދުވަހު އިންޑިއާގެ މެޑްރާސްގެ އެޕޯލޯ ހޮސްޕިޓަލާއި އަދި ސްރީލަންކާގެ ނަވަލޯކާ ހޮސްޕިޓަލާ އެކު ސެނަހިޔާ އިން ސޮއިކުރި އެމްއޯޔޫ ގެ ދަށުން ހިންގޭ މިފަދަ ފުރަތަމަ ޕްރޮގްރާމް ކަމުގައި ވެސް ސެނަހިޔަ ހޮސްޕިޓަލުން ބުންޏެވެ.
އެތަނުން ފަރުވާ ހޯދުމަށް އެޕޮއިންޓްމަންޓް ހަދައި، ނަން ނޯޓް ކުރުމުގެ ފުރުޞަތު ވަނީ ހުޅުވާލާފަ އެވެ. އެގޮތުން ސިފައިންނާއި ސިފައިންގެ އާއިލާތަކަށް އަދި ސެނަހިޔައިން ޚިދުމަތް ދެއްވަމުން ގެންދަވާ ޔުނީފޯމް އެޅި ސަވިސްތަކުގެ މުވައްޒަފުންނާއި އެ މުވައްޒަފުންގެ އަނބި ދަރިންނާއި މައިން ބަފައިންގެ އިތުރުން، ޖާގަ އޮތް މިންވަރަކުން އެހެނިހެން ފަރާތްތަކަށް ވެސް މި ޑޮކްޓަރަށް ދެއްކުމުގެ ފުރުޞަތު ވަނީ ހުޅުވާލެވިފައި ކަމަށް ސެނަހިޔަ ހޮސްޕިޓަލުން ބުންޏެވެ.
ޑޮކްޓަރަށް ދައްކަވަން ބޭނުންފުޅުވެލައްވާ ފަރާތްތަކުން ސެނަހިޔަގެ ފޯނު ނަންބަރު 9906150 ނުވަތަ 3322607 އަށް ގުޅުއްވާފައި އެކްސްޓެންޝަން ނަންބަރ 3291 ގުޅުއްވައިގެން ނަންބަރ ނޯޓް ކުރައްވަމުން ގެންދެވުމަށާއި އެޕޮއިންޓްމަންޓް ހަމަޖައްސައި ދިނުމުގައި އިސްކަން ދޭނީ ނަން ނޯޓް ކުރާ ތަރުތީބުން ކަމަށް ސެނަހިޔަ ހޮސްޕިޓަލުން މަޢުލޫމާތު ދެ އެވެ.