ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހް، (އިބޫ)ގެ ރަނިން މޭޓަކަށް ކާށިދޫ ދާއިރާގެ މަޖިލިސް މެމްބަރު ފައިސަލް ނަސީމް އައްޔަން ކޮށްފިއެވެ.
ޖޭޕީގެ ކައުންސިލްގެ ސިއްރު ވޯޓަކުން ފައިސަލް ނަސީމް ހޮވާފައިވާއިރު މިރޭ ޕާޓީގެ ލީޑަރު ގާސިމް އިބްރާހިމް ވަނީ ފައިސަލަށް ކުރަމުން އައި ތާއީދު އަނބުރާ ގެންގޮސްފައިވާކަން އިއުލާން ކޮށްފައެވެ.
ފައިސަލް ޖޭޕީގެ ރަނިން މޭޓުކަން ހޯއްދެވީ ކައުންސިލުން ބޭއްވި ސިއްރު ވޯޓުގައި އޭނާ އާއި އެންމެ ކައިރިން ވާދަކުރެއްވި ކެންދޫ ދާއިރާގެ މެމްބަރ އަލީ ހުސެއިންއަށް ވުރެ އެއް ވޯޓު އިތުރަށް ހޯއްދަވައިގެންނެވެ.
ފައިސަލްއަށް 15 ވޯޓު ލިބިވަޑައިގަތްއިރު އަލީ ހުސެއިންއަށް ލިބި ލެއްވީ 14 ވޯޓެވެ. އަމީންއަށް ނުވަ ވޯޓު ލިބިވަޑައިގަތް އިރު ޑރ. ހުސެއިން ރަޝީދު ހަސަން އަށް ލިބިލެއްވީ 2 ވޯޓެވެ.
ފައިސަލް އިއްތިހާދުގެ ރަނިންމޭޓަކަށް ހޮވިވަޑައިގަތް އިރު އިއްތިހާދުގެ ކެންޑިޑޭޓު އިބޫ ގެންދަވަނީ އައްޑޫ އަދި ފުވައްމުލަކަށް ކުރައްވާ ދަތުރުފުޅެއްގައި އައްޑޫ ސިޓީގައެވެ.