ފީނަން އުޅުމުގެ ތެރޭގައި ޑީކޮމްޕްރެޝަން ސިކްނެސް (ޑީކޯ) ވާ ފަރާތްތަކަށް ފަރުވާދެވޭނެ އިންތިޒާމު އައްޑޫ ސިޓީގައި ގާއިމްކުރުމަށް މަސައްކަތް ކުރައްވާނެ ކަމަށް އިދިކޮޅު ކޯލިޝަނުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިޙް ވިދާޅުވެއްޖެއެވެ.
މިއަދު އައްޑޫ ސިޓީ، މަރަދޫގައި އިބޫ މަސްވެރިންނާއި ބައްދަލުކުރެއްވައި ކަންބޮޑުވުންތައް އޮޅުން ފިލުއްވިއެވެ. މަސްވެރިންގެ އެންމެ ބޮޑު ކަންބޮޑުވުމެއްގެ ގޮތުގައި ފާހަގަކުރީ ޑީކޯ ވެގެން ފަރުވާ ލިބޭނެ އިންތިޒާމް އައްޑޫގައި ގާއިމްވެފައި ނެތުމެވެ.
އައްޑޫގައި މީގެ ކުރިން ޑީކޯ ވާ ފަރާތްތަކަށް ފަރުވާދޭ ޗެމްބަރެއް ހުރިއެވެ. ޝަންގްރިއްލާ ރިސޯޓުން އެ ޗެމްބަރު ބަންދުކުރި ނަމަވެސް ރައީސް ޔާމީންގެ ސަރުކާރުން އެކަމާއި މެދު އެއްވެސް އެއްޗެއް ބުނެފައެއް ނުވެއެވެ.
މަސްވެރިންގެ ކަންބޮޑުވުންތައް އަޑުއެއްސެވުމަށް ފަހު އިބޫ ވިދާޅުވީ، އައްޑޫ ސިޓީ ހޮސްޕިޓަލުގައި ޑީކޯ ވާ ފަރާތްތަކަށް ފަރުވާ ދިނުމަށް ޚާއްސަ ތަނެއް (ޗެމްބަރެއް) ޤާއިމްކުރެވިދާނެ ކަމަށެވެ. އަދި އެއީ ކުރެވިދާނެ ކަމެއް ކަމަށާއި އިދިކޮޅު ކޯލިޝަނުގެ ސަރުކާރެއްގައި އެކަން ކުރުމަށް ޚާއްސަ އިސްކަމެއް ދެއްވާނެ ކަމަށެވެ.