ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ފަރާތުން އައްޑޫގައި ގްރާސްރޫޓް ކޯޗިން ކޯހެއް ބާއްވައިފި އެވެ.
މި މަހުގެ 9 ވަނަ ދުވަހު ފެށި މި ކޯސް އިއްޔެ ނިންމާލި އިރު 18 ބައިވެރިޔަކު ވަނީ ސެޓްފިކެޓް ހާސލްކޮށްފަ އެވެ. އޭގެ ތެރޭގައި އަންހެން 7 ބައިވެރިޔަކު ވެސް ހިމެނެ އެވެ.
ކޯހުގައި ކިޔަވައި ދެއްވީ އައްޑޫ ސިޓީގެ ޒުވާނުންގެ މެދުގައި އެންމެ މަޤްބޫލް ފުޓްބޯޅަ ކޯޗް އަހްމަދް ޝަރީފް (ޑުންގާ) އެވެ. ޑުންގާ އަކީ ފީފާގެ ގްރާސްރޫޓް އިންސްޓްރަކްޓަރެކެވެ.
ގްރާސް ރޫޓް ލެވެލް ކޯޗިން ކޯހުގެ ނިންމުން ފާހަގަ ކުރުމުގެ ގޮތުން އިއްޔެ ވަނީ ކުޑަކުދިންގެ ފުޓްބޯޅަ ފެސްޓިވަލެއް ވެސް ކުރިއަށް ގެންގޮސް ފައެވެ. އެ ހަރަކާތުގައި ގިނަ އަދަދެއްގެ ކުޑަކުދިން ވަނީ ބައިވެރިވެފަ އެވެ.
އެފްއޭއެމް އިން ފީފާގެ އެހީތެރިކަމާއި އެކު ހިންގާ ގްރާސް ރޫޓް ޕްރޮގްރާމްގެ ބޭނުމަކީ ކުޑަކުދިން ފުޓްބޯލައަށް އަހުލުވެރިކޮށް، ތަމްރީނުތައް ފޯރުކޮށްދިނުމެވެ.
އެފްއޭއެމުން ބުނި ގޮތުގައި ގްރާސް ރޫޓް ކޯޗިން ކޯސްތަކުން ކޯޗުން މެދުވެރިކޮށް ފުޓްބޯޅަ ކުރިއެރުވުމަށް ގިނަ މަސައްކަތްތަކެއް އެ އިދާރާއިން ކުރިއަށް ގެންދާނެ އެވެ.
ފީފާގެ އެހީތެރިކަމާ އެކު ދުނިޔޭގެ އެކި ގައުމުތަކުގައި ހިންގާފައިވާ ގްރާސްރޫޓް ޕްރޮގްރާމްތަކުގެ ސަބަބުން ފާއިތުވި 10 ވަރަކަށް އަހަރުތެރޭ 50،000 ވުރެން ގިނަ ކުޅުންތެރިން ފުޓްބޯޅަ އަށް ނެރެދީފައިވާ ކަމަށް ދިރާސާތަކުން ދައްކަ އެވެ.
ރާއްޖެ އަކީ ޖަޒީރާ ގައުމަކަށް ވެފައި ހުރިހާ ރަށެއްގައި ވެސް ފުޓްބޯޅަ ފޯރި އޮންނައިރު ރަނގަޅު ކުޅުންތެރިން ޒުވާން އުމުރުގައި ހޯދުމަކީ ބޮޑު ޗެލެންޖެކެވެ.