ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހް (އިބޫ)އާއި ރަނިންމޭޓް ފައިސަލް ނަސީމު ފުވައްމުލަކަށް ވަޑައިގަތުމުން އެރަށުން ވެސް ހޫނު މަރުޙަބާއެއް ކިޔައިފިއެވެ.
ކަނޑު މަގުން ފުވައްމުލަކަށް ވަޑައިގެންނެވި އިބޫއާއި ފައިސަލް އަށް މަރުހަބާ ކިޔުމަށް އެރަށުގެ އެތައް ސަތޭކަ ބަޔަކު ވަނީބަނދަރު ސަރަހައްދަށް ޖަމާވެފަ އެވެ. އެގޮތުން އިބޫ އާއި ފައިސަލާއި ސަލާމްކުރުމަށް ގޮސް ތިބި މީހުންގެ ސަފުތައް ދޮޅު ކިލޯ މީޓަރަށް ދެމިގެން ގޮސްފައިވެއެވެ.
ފުވައްމުލަކަށް އިބޫއާއި ފައިސަލް ވަޑައިގެންނެވި ވަގުތު ޔުނީފޯމްގައި ތިބި ގިނަ އަދަދެއްގެ ފުލުހުން ސަލާމަތީ ކަންކަން ބެލުމަށް ހަރަކާތްތެރިވަމުން ދިޔައެވެ.
މައުލޫމާތު ލިބިފައިވާ ގޮތުގައި އިބޫ އާއި ފައިސަލް ފުވައްމުލަކަށް ވަޑައިގެން މިހާރު ގެންދަވަނީ އެރަށުގެ ބައެއް ގޭގެއަށް ޒިޔާރަތްކުރައްވާ ރައްޔިތުންނާއި ބައްދަލުކުރައްވަމުންނެވެ.