ރައީސް އަބްދުﷲ ޔާމީންގެ ސަރުކާރާއި ގުޅިފައިވާ ބައެއް ފަރާތްތަކާމެދު ދަތިކުރުމުގެ ފިޔަވަޅު އެޅުމަށް ޔޫރަޕިއަން ޔޫނިއަން(އީޔޫ)ގެ ފޮރިން އެފެއާޒް ކައުންސިލްގެ ބައްދަލުވުމެއް ހޯމަ ދުވަހަށް އެޖެންޑާކޮށްފި އެވެ.
އެ ބައްދަލުވުމުގެ އެޖެންޑާގެ ނޮން ލެޖިސްލޭޓިވް ހަރަކާތްތަކުގެ 5 ވަނަ ނަންބަރަކަށް އޮތީ ދިވެހިރާއްޖޭގެ މައްސަލަ އެވެ.
އީޔޫ އިން ދަތިކުރުމުގެ ފިޔަވަޅު އަޅަނީ، އިންސާނީ ހައްގުތަކާއި، ގާނޫނުތައް ނެގެހެއްޓުމަށާއި، ސިޔާސީ ހައްލެއް ހޯދުމަށް ހުރަސް އަޅާ ފަރުދުންނާއި، ބައެއް ފަރާތްތަކާމެދު އެވެ.
ރާއްޖޭގެ މައްސަލަ އީޔޫގެ ކައުންސިލަށް ހުށަހެޅީ ފާއިތުވި މާޗްމަހުގެ ތެރޭގައެވެ. އެ މައްސަލަ ހުށަހަޅާފައިވަނީ ދިވެހިރާއްޖޭގެ ރައްޔިތުންގެ އަސާސީ ޙައްޤުތަކާއި މިނިވަންކަން ހަނިކޮށް، ހިފެހެއްޓުމަށް ބާރުދީ އެކަން ކުރުމުގައި ބައިވެރިވާ ފަރާތްތަކުގެ މުދާ ވިލާތުގެ ޤައުމުތަކުގައި ހުރިނަމަ އެ މުދާ ހިފަހައްޓައި، އެފަރާތްތަކަށް ވިލާތަށް ދަތުރުކުރުން މަނާ ކުރުމަށެވެ.
ރާއްޖެއާމެދު ފިޔަވަޅު އަޅަން އީޔޫއިން ތައްޔާރުވަމުން ދާ ކަމުގެ މައުލޫމާތު ލިބިވަޑައިގެންފައިވާ ކަމަށް މީގެ ކުރިން ރައީސް ޔާމީން ވެސް ވަނީ ވިދާޅުވެފައެވެ.