ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) އާއި އެމަނިކުފާނުގެ ރަނިންގމޭޓް ފައިސަލް ނަސީމް ފުވައްމުލަކަށް ވަޑައިގަތުމަށް ފަހު އަނެއްކާ ވެސް މިއަދު އައްޑުއަށް ވަޑައިގަންނަވާނެއެވެ.
އިބޫ އާއި ފައިސަލް ފުވައްމުލަކަށް ވަޑައިގެންނެވީ އައްޑޫއަށް ވަޑައިގަތުމަށް ފަހުގައެވެ. މިއަދު އެނބުރި އައްޑޫއަށް ވަޑައިގެންނެވުމަށް ހަމަޖެހިފައި އޮތީ މިއަދު ހެނދުނު 9 ޖަހާއިރުއެވެ. އެހެން ނަމަވެސް އައްޑޫއަށް ވަޑައިގެންނެވުން މިހާރު ވަނީ ފަސްކުރައްވާފައެވެ.
މައުލޫމާތު ލިބިފައިވާ ގޮތުގައި މެންދުރު ފަހުގެ ވަގުތެއްގައި އިބޫ އައްޑޫއަށް ވަޑައިގަންނަވާނެއެވެ.
އިބޫ އައްޑޫއަށް ވަޑައިގެންނެވީ ހުކުރު ދުވަހުގެ ހަވީރުއެވެ އަދި ފައިސަލް އައްޑޫއަށް ވަޑައިގެން ކެމްޕެއިން ޓީމާއި ގުޅިވަޑައިގަތީ ހޮނިހިރު ދުވަހުގެ ހެނދުނުއެވެ.
އައްޑޫއަށް ވަޑައިގަތުމުން އިބޫއަށް ހޫނު މަރުހަބާއެއް ކިޔާފައިވާއިރު އިއްޔެ ފުވައްމުލަކުން ވެސް ވަނީ އިބޫ އާއި ފައިސަލް އަށް ހޫނު މަރުހަބާއެއް ކިޔާފައެވެ. ފުވައްމުލަކުގައި އިބޫ އާއި ފައިސަލް އާއި ސަލާމްކުރުމަށް ޖަމާވި މީހުންގެ ސަފުތައް ގާތްގަނޑަކަށް ދޮޅު ކިލޯ މީޓަރަށް ދެމިގެން ގޮސްފައިވެއެވެ.