ޕީޕީއެމްގެ ރިޔާސީ ކެންޑިޑޭޓް، ރައީސް އަބްދުﷲ ޔާމީން އަކީއިގްތިސާދީ ގޮތުން ދުވަހަކުވެސް ރާއްޖެ ނުދެކޭފަދަ ކުޅަދާނެ ބޭފުޅެއް ކަމަށް ޕީޕީއެމްގެ ނައިބު ރައީސް އަދި ރައްޔިތުންގެ މަޖިލީހުގެ ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
އަދުރޭ މިހެން ވިދާޅުވީ ރޭ ޕީއެސްއެމްއިން ގެނެސްދިން "ދެންްކޮންސުވާލެއް" ޕްރޮގްރާމުގައި ވާހަކަ ދައްކަވަމުންނެވެ.
ރާއްޖެއަށް ބޭނުންވަނީ ތަޖުރިބާހުރި ވެރިއެއްކަން ފާހަގަކުރައްވައި އަދުރޭ ވިދާޅުވީ، ރައީސް ޔާމީނަކީ"ރާއްޖެ ނުދެކޭފަދަ އިގްތިސޯދީގޮތުން ކުޅަދާނަ ބޭފުޅެއް" ކަމަށެވެ.
ރައްޔިތުންގެ މައްޗަށް ވެރިކަން ކުރާ ރައީސަކީ ކިހާވަރެއްގެ ގާބިލު ބޭފުޅެއްކަން ރައްޔިތުންނަށް އެގެންޖެހޭ ކަން ފާހަގަކުރައްވައި އަދުރޭ ވިދާޅުވީ، "ތަޖުރިބާ ނެތް ގޮތްނޭނގޭ ވެރިޔަކު ރައްޔިތުން ބޭނުން ނުވާ" ކަމަށެވެ.
މީގެ އިތުރުން އިދިކޮޅު ފަރާތްތަކަށް ވަރަށް ބޮޑަށް ފާޑުވިދާޅުވެ އަދުރޭ ވަނީ އެފަރާތްތަކުން އުޅެނީ ރައީސް ޔާމީން ގެންނަވާ ތަރައްގީ ފެނި "ހަޖަމު ނުވެގެން" ކަމަށް ވެސް ވިދާޅުވެފައެވެ.