ސިޔާސީ ޕާޓީތަކުގެ މަޝްވަރާއަށް އައުުމަށް ރައީސް ޔާމީންގެ ސަރުކާރުން ދިން ދައުވަތަކީ ބައިނަލްއަޤްވާމީ މުޖްތަމަޢުގެ ފަރާތްތަކުގެ "ލޮލުގައި އަޅުވާ އަނދުނެއް ކަމަށާއި އެއީ ސަރުކާރުން ދައްކާ ދަޅައެއް ކަމަށް އަދާލަތު ޕާޓީގެ މީޑިއާ ކޮމެޓީގެ މުގައްރިރު އަލީ ނަޒީރު ވިދާޅުވެއްޖެއެވެ.
ރާއްޖެ ޓީވީގައި ވާހަކަ ދައްކަވަމުން އަލީ ނަޒީރު ވިދާޅުވި ގޮތުގައި ސަރުކާރުން މަޝްވަރާ އަށް ގޮވާލީ އިހުލާސްތެރި ނިޔަތަކާއި އެކުގައި ނޫން ކަމަށެވެ.
އަލީ ނަޒީރު ވިދާޅުވި ގޮތުގައި މީގެ ކުރިން ވެސް އިދިކޮޅު ފަރާތްތަކުން އިޚްލާސްތެރިކަމާއި އެކު މަޝްވަރާތަކަށް ގޮވާލި ކަމަށާއި އެހެން ނަމަވެސް އެގޮވާލުންތަކަށް ސަރުކާރުން ދިނީ "ބީރު ކަންފަތެއް" ކަމަށެވެ.
ގުޅިފައިވާސިޔާސީ ޕާޓީތަކުން މީގެ ކުރިން ވަނީ ސަރުކާރާއި އެކު މަޝްވަރާ ތަކުގައި ބައިވެރިވާނީ އދ. ފަދަ ޖަމިއްޔާއެއް މެދުވެރިވެގެން ކަމަށް ބުނެފައެވެ. އެކަން ފާހަގަކުރައްވައި އަލީ ނަޒީރު ވިދާޅުވީ، އިދިކޮޅު ޕާޓީތަކުން އަދިވެސް ތިބީ އެގޮތުގައި ކުރިއަށް ދިއުމަށް ކަމަށެވެ.
އިދިކޮޅު ސިޔާސީ ޕާޓީތަކުގެ ރިޔާސީ ކެންޑިޑޭޓްގެ ރަނިންމޭޓަކަށް ފައިސަލް ނަސީމް ހޮވުމާއި ގުޅިގެން އޭނާއަށް މަރުހަބާ ކިޔައި ސަރުކާރުން މަޝްވަރާއަށް ގޮވާލާފައެވެ. މިއީ މަހެއްހާ ދުވަހުގެ ތެރޭގައި ސަރުކާރުން މަޝްވަރާއަށް ގޮވާލި ދެވަނަ ފަހަރެވެ.