އާސެނަލް ގެ ކޯޗުކަމާއި އުނާއި އެމެރީ ހަވާލުވުމަށްފަހު އެޓީމު ޕްރީސީޒަންގައި ކުޅުނު ފުރަތަމަ މެޗުގައި އިނގިރޭސި ފަސްވަނަ ޑިވިޝަނުގެ ކުލަބެއްކަމަށްވާ ބޯހަމްވުޑް އަތުން ތަފާތު ބޮޑު ނަތީޖާއަކުން މޮޅުވެއްޖެއެވެ. އާސެނަލް މިމެޗު ކާމިޔާބުކުރީ 8-0 އިންނެވެ.
ބޯހަމްވުޑް ގެ މެޑޯޕާކްގައި ކުޅެވުނު މިމެޗުގެ ފުރަތަމަ ހާފުގައި އާސެނަލުން ފަސް ލަނޑުޖަހާފައިވެއެވެ. މެޗު ފެށިގެން 17 މިނެޓުތެރޭގައި އެޓީމުގެ ޕިއޭރް އެމެރިކް އޮބަމަޔަން ވަނީ ހެޓްރިކް ހަދާފައެވެ. މިހާފުގައި އާސެނަލުން ކާމިޔާބުކުރި އަނެއް ދެލަނޑު ޖަހައިދިނީ ރީސް ނެލްސަން އާއި އަލެކްސެންޑަ ލަކަޒެޓް އެވެ.
މެޗުގެ ދެވަނަ ހާފުގެ ކުރީކޮޅު އާސެނަލްގެ ހަވަނަ ލަނޑު ޖަހައިދިނީ ޒުވާން ކުޅުންތެރިޔާ އެޑީ އެންކީޓިއާ އެވެ. އެ ޓީމުގެ ފަހު ދެލަނޑު ކާމިޔާބުކޮށްދިނީ ޖެފް ރެނޭ އަޑެލައިޑް އާއި ހެންރިކް މިކިތާރްޔަން އެވެ. މީގެއިތުރުންވެސް އެޓީމުން ވަނީ ލަނޑުޖަހާނެ ގިނަ ފުރުޞަތުތަކެއް ތަނަވަސްކޮށްފައެވެ.
އާސެނަލުން ޕްރީސީޒަންގެ ފުރަތަމަ މެޗުން ބޮޑު މޮޅެއް ހޯދިއިރު މިމެޗުގެ ސްކޮޑްގައި ނުހިމެނޭ ކުޅުންތެރިންނަކީ މެސުތު އޮޒިލް، ގްރެނިޓް ޒާކާ އާއި މުހައްމަދު އެލްނެނީ ގެ އިތުރުން މިސީޒަނަށް އަލަށް ގެނައި ލޫކަސް ޓޮރެއިރާ އަދި ސްޓެފަން ލީޗްސްޓެއިނާ އެވެ. ބެލެވޭގޮތުގައި ކުރިއަށް އޮތް ދެތިން ހަފްތާގެ ތެރޭގައި މި ކުޅުންތެރިން އެޓީމުގެ ޕްރެކްޓިހުގައި ބައިވެރިވާނެއެވެ.
އާސެނަލްގެ އައު ކޯޗު އުނާއި އެމެރީ ގެ އިރުޝާދުގެ ދަށުން އެޓީމު ކުޅޭ ދެވަނަ މެޗުގައި އިންޓަނޭޝަނަލް ޗެމްޕިއަންސް ކަޕްގައި މިމަހުގެ 26 ވަނަ ދުވަހު ނިކުންނާނީ ސްޕެއިނުގެ އެތުލެޓިކޯ މެޑްރިޑާއި ދެކޮޅަށެވެ.