ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިޙް(އިބޫ) އަކީ ސިޔާސީ މައިދާނަށް ވަޑައިގެންނެވުމުގެ ކުރިން ވެސް ކްރިކެޓް ކުޅުއްވި ބޭފުޅެކެވެ. ސިޔާސީ މައިދާނުގައި ހަރަކާތްތެރިވާން ފެއްޓެވި ފަހުން ވެސް އިބޫ ކްރިކެޓް ކުޅުއްވާ މަންޒަރު ކޮންމެވެސް ވަރަކަށް ވަނީ ފެނިފައެވެ.
މިހާރު ފުވައްމުލަކަށް ކުރައްވަމުން ގެންދަވާ ދަތުރުފުޅުގެ ތެރެއިން އިބޫ ވަނީ 2011 ވަނަ އަހަރުގެ މިއީ ސާކް ސަމިޓާއި ދިމާކޮށް ކުރީގެ ރައީސް މުހައްމަދު ނަޝީދުގެ ވެރިކަމުގައި ޤާއިމްކުރެއްވި ކްރިކެޓް ސްޓޭޑިއަމްގައި ކްރިކެޓް ކުޅުއްވާފައެވެ.
އެ ސްޓޭޑިއަމަށް ވަޑައިގެން އިބޫގެ އިތުރުން އެމަނިކުފާނުގެ ރަނިން މޭޓް ފައިސަލް ނަސީމް ވެސް ވަނީ ކްރިކެޓް ކުޅުމުގައި ބައިވެރިވެ ވަޑައިގެންފައެވެ.
އަދި އެއަށްފަހު ކްރިކެޓް ސްޓޭޑިއަމްގައި ޕްރެކްޓިސް ކުރަމުން ދިޔަ ކުދިންނާއި ވާހަކަ ދައްކައި އެކުދިންގެ ޚިޔާލުތައް ވެސް އިބޫ ވަނީ އޮޅުން ފިލުއްވާފައެވެ.
ފުވައްމުލަކުގައި އިބޫ އާއި ފައިސަލް ކުރިއަށް ގެންދަވާ ކެމްޕެއިން ހަރަކާތްތަކުގެ ތެރޭގައި ދޮރުން ދޮރަށް ހިންގެވުމުގެ އިތުރުން ޒުވާނުންގެ ކަންބޮޑުވުންތައް އޮޅުން ފިލުވުމަށް ޒުވާނުންނާއި ބައްދަލުވުންތައް ވެސް ކުރިއަށް ގެންދަވައެވެ. އަދި ފުވައްމުލަކުގެ ބައެއް އާސާރީ ތަންތަނަށް ވެސް ވަނީ ޒިޔާރަތް ކުރައްވާފައެވެ.