ޔޫރަޕިއަން ޔޫނިއަން (އީޔޫ) އިން ރާއްޖެއާއި ދެކޮޅަށް ފިޔަވަޅު އަޅައިފި ނަމަ އެ ޖަމިއްޔާއަށް މާ ބޮޑެތި ގެއްލުންތަކެއް ވާނެ ކަމަށް އީގެމަނަފުށީ ދާއީރާގެ މެންބަރު ޖަމީލް އުސްމާން ވިދާޅުވެއްޖެއެވެ.
އީޔޫ އިން މާދަމާ ފިޔަވަޅު އަޅަން ނިންމާފައިވަނީ ދިވެހިރާއްޖޭގެ ހުރިހާ ރައްޔިތުންނާއި ދެކޮޅަކަށް ނޫނެވެ. އެހެން ނަމަވެސް އީޔޫ އިން ފިޔަވަޅު އަޅަނީ ރައީސް ޔާމީންގެ ސަރުކާރުގެ ބައެއް ވެރިންނާއި ދެކޮޅަށެވެ.
އޮންލައިން ނޫސް "ވަގުތު" އަށް ދެއްވި އިންޓަވިއުއެއްގައި ޖަމީލް އުސްމާން ވިދާޅުވި ގޮތުގައި އީޔޫ އިން ދަތިކުރުމުގެ ފިޔަވަޅުއަޅައިފި ނަމަ "އެއީ އެ ބޭފުޅުން ބޭނުންވާ ކަންތަތަކެއް ހާސިލް ކުރަން އަޅާ ފިޔަވަޅަކަށް ވާނެ" ކަމަށެވެ.
ޖަމީލް އުސްމާން ވިދާޅުވި ގޮތުގައި އީޔޫ އިން ބޭނުންވަނީ އެ ޖަމިއްޔާއިން ބޭނުންވާ މީހަކަށް ވެރިކަމަށް ކުރިމަތިލެވޭނެ ގޮތް ހެދުމަށާއި އަދި ރާއްޖޭގައި އިސްލާމު ދީން ނޫން އެހެން ދީނަކަށް ފުރުސަތު ހޯދައި ދިނުމަށް ކަމަށެވެ.
"އެބޭފުޅުން ރާއްޖެއާއި ދިވެހި ރައްޔިތުންނާއި ދެކޮޅަށް ފިޔަވަޅު އަޅައިފި ނަމަ އެބޭފުޅުނަށް ވާނެ ގެއްލުން ވަކި ކުޑައެއް ނުވާނެ" ޖަމީލް އުޘްމާން ވިދާޅުވިއެވެ.
އީޔޫގެ ފޮރިން އެފެއާޒް ކައުންސިލުން މާދަމާ ބައްވާ ބައްދަލުވުމުގެ އެޖެންޑާގައި ބުނެފައިވާ ގޮތުން ރާއްޖޭގެ އިންސާނީ ހައްގުތަކާއި، ގާނޫނުތައް ނެގެހެއްޓުމަށާއި، ސިޔާސީ ހައްލެއް ހޯދުމަށް ހުރަސް އަޅާ އެންމެހާ ފަރާތްތަކާއި ދެކޮޅަށް ފިޔަވަޅު އަޅާނެ ގޮތްތައް އެ ބައްދަލުވުމުގައި ކަނޑައެޅިގެންދާނެއެވެ.