ރިސޯޓުތަކުގައި މަސައްކަތް ކުރާ ދިވެހި މުވައްޒަފުންނަށް ފަސޭހަކަމާއެކު ވޯޓު ލެވޭނެ އިންތިޒާމް ހަމައްޖައްސައި ދޭން ޖެހޭނެ ކަމަށް ގުޅިފައިވާ އިދިކޮޅު ސިޔާސީ ޕާޓީތަކުގެ ރިޔާސީ ކެންޑިޑޭޓްގެ ރަނިން މޭޓް، ފައިސަލް ނަސީމް ވިދާޅުވެއްޖެއެވެ.
ފައިސަލް ނަސީމް މިހެން ވިދާޅުވީ، ރިސޯޓުތަކުގައި ބަހައްޓާ ވޯޓު ފޮށީގެ އަދަދު ވަރަށް ބޮޑަށް މަދުކުރުމަށް އިލެކްޝަންސް ކޮމިޝަނުން ނިންމާފައި ވަނިކޮށް އެކަމާއި ކަންބޮޑުވުން ފާޅުކުރައްވައި ކުރެއްވި ޓްވީޓެއްގައެވެ. ލޯކަލް ކައުންސިލް އިންތިޚާބުގައި ރާއްޖޭގެ 42 ރިސޯޓެއްގައި ވޯޓު ފޮށި ބެހެއްޓިއެވެ. އެހެން ނަމަވެސް ސެޕްޓެމްބަރު 23 ގައި އޮންނަ ރިޔާސީ އިންތިޚާބުގައި ވޯޓު ފޮށި ބަހައްޓަން ހަމަޖެހިފައިވަނީ އެންމެ ހަތް ރިސޯޓުގައެވެ.
އެކަމާއި ގުޅިގެން ކަންބޮޑުވުން ފާޅުކުރައްވައި، ފައިސަލް ވަނީ ވީހާވެސް ގިނަ ރިސޯޓެއްގައި ވޯޓު ފޮށި ބެހެއްޓުމަށް އިލެކްޝަންސް ކޮމިޝަނަށް ގޮވާލައްވާފައެވެ.
ފައިސަލްގެ އިތުރުން އިދިކޮޅު ސިޔާސީ ފަރާތްތަކުން ވެސް ދަނީ ރިސޯޓުތަކުގެ މުވައްޒަފުންނަށް ފަސޭހަކަމާޢި އެކު ވޯޓު ލެވޭނެ އިންތިޒާމު ހަމަޖެއްސުމަށް ގޮވާލައްވަމުންނެވެ. އެހެން ނަމަވެސް ސަރުކާރަށް ނިސްބަތްވާ އެއްވެސް ބޭފުޅަކު މިކަމާއި ބެހޭގޮތުން އެއްޗެއް ވިދާޅު ނުވެއެވެ.