ރިސޯޓުތަކުގައި މަސައްކަތް ކުރާ ދިވެހި މުވައްޒަފުންނަށް ރިޔާސީ އިންތިޚާބުގައި ވޯޓުލުމުގެ ހައްގު ހޯދުމަށް މަސައްކަތް ހުއްޓާލުމަށް ގޮވާލަން ކުރީގެ ބަންޑާރަ ނައިބު ހުސްނުއް ސުއޫދު ގޮވާލައްވައިފި އެވެ.
ސުއޫދު މިގޮތަށް ގޮވާލެއްވީ، މިއަހަރުގެ ރިޔާސީ އިންތިޚާބަށް ރިސޯޓުތަކުގައި ބަހައްޓާ ވޯޓު ފޮށީގެ އަދަދު ވަރަށް ބޮޑުތަނުން މަދުކުރަން އިލެކްޝަންސް އިން ނިންމާފައި ވަނިކޮށެވެ. 2013 ވަނަ އަހަރުގެ ރިޔާސީ އިންތިޚާބުގައި ރާއްޖޭގެ 40 ރިސޯޓެއްގައި ވޯޓު ފޮށި ބެހެއްޓިއެވެ. އެހެން ނަމަވެސް ސެޕްޓެމްބަރު 23 ގައި އޮންނަ މިއަހަރުގެ ރިޔާސީ އިންތިޚާބުގައި ވޯޓު ފޮށި ބަހައްޓަން ހަމަޖެހިފައިވަނީ އެންމެ ހަތް ރިސޯޓުގައެވެ.
އެހެންވެ ރިސޯޓުތަކުގައި މަސައްކަތް ކުރާ 17000 އެއްހާ މުވައްޒަފުންގެ ތެރެއިން ގިނަ ބަޔަކަށް ވޯޓުލުމުގެ ހައްގު ނުލިބުމުގެ ބިރު ވަނީ ކުރިމަތިވެފައެވެ.
ސުއޫދު ކުރެއްވި ޓްވީޓެއްގައި ވިދާޅުވީ، ވޯޓު ފޮށިތައް ބަހައްޓާ އަދަދު މަދު ކުރުމުން ގިނަ ބަޔަކު ވޯޓު ލުމުގެ ހައްގުން މަހްރޫމް ވާނެ ކަމަށެވެ.
"ވޯޓު ލުމުގެ ހައްގު ހޯދުމަށްޓަކައި ރިސޯޓްތަކުގައި މަސައްކަތް ކުރުން ހުއްޓާލުމަށް ރިސޯޓްތަކުގެ މުވައްޒަފުންނަށް ގޮވާލަން" ސުއޫދު ކުރެއްވި ޓްވީޓްގައި ވެއެވެ.
ރިސޯޓުތަކުގެ މުވައްޒަފުންނަށް ވޯޓު ލުމުގެ ހައްގު ގެއްލޭ ފަދަ ގޮތަކަށް އަމަލުކުރަމުންދާތީ އެކަން ހުއްޓުވުމަށް ގިނަ މަސައްކަތްތަކެއް ކުރާނެ ކަމަށް އިދިކޮޅު އެމްޑީޕީން ވެސް ވަނީ ބުނެފައެވެ.