ހައްގުތައް ނިގުޅައި ގަތުމަށް ފަހު ބާއްވާ އިންތިހާބެއް ގަބޫލް ނުކުރާނެ ކަމަށް އިއްތިހާދުގެ ރަނިންމޭޓް ފައިސަލް ނަސީމް ވިދާޅުވެއްޖެ އެވެ.
އެމްޑީޕީ ހަރުގޭގައި ރޭ ބޭއްވި ޖަލްސާގައި ވާހަކަފުޅު ދައްކަވަމުން ފައިސަލް ވިދާޅުވީ ނުކުޅެދުންތެރިކަން ހުންނަ ފަރާތްތަކުގެ ވޯޓު އީސީގެ އޮފިޝަލުން ދިނުމަކީ ވޯޓަށް ނުފޫޒު ފޯރުވުން ކަމަށެވެ. އަދި މަދު ރިސޯޓެއްގައި ވޯޓު ފޮށި ބަހައްޓަން ނިންމި ނިންމުމަށްވެސް ފައިސަލް އަލިއަޅުވާލެއްވިއެވެ.
ފައިސަލް ވިދާޅުވީ ކުރިއަށް އޮތް ރިޔާސީ އިންތިހާބަށް އަމާޒުކޮށްގެން އެތައް ބައެއްގެ ވޯޓް ލުމުގެ ހައްގު ގެއްލޭ ގޮތަށް އިލެކްޝަންސް ކޮމިޝަނުން މަސައްކަތްތަކެއް ކުރަމުންދާކަމަށެވެ.
"އިންތިހާބުގައި ވޯޓުލުމުގެ ހައްގަކީ ކޮންމެ ރައްޔިތަކަށްވެސް ލިބިގެންވާ ހައްގެއް. އެއީ ގާނޫނު އަސާސީން ކަށަވަރުކޮށްދީފައިވާ ހައްގެއް. އެ ހައްގު ނިގުޅައި ނުގަނެވޭނެ. އެ ހައްގު ނިކުޅައިގަނެވޭނެ ގޮތަކަށް ބާއްވާ އިންތިހާބަކީ ދިވެހި ރައްޔިތުން ގަބޫލުކުރާނެ އިންތިހާބެއް ނޫން،"
ފައިސަލް ވިދާޅުވި އެވެ.
ފައިސަލް ވިދާޅުވީ އިއްތުހާދުގެ ސަރުކާރެއްގައި ރައްޔިތުން ހަމަހަމަކަމާއި އެކު އިންސާފު ގާއިމްކޮށްދޭނެކަމަށެވެ.
އިލެކްޝަނުން ރޭ ވަނީ ހަތް ރިސޯޓެއްގައި ވޯޓު ފޮށި ބެހެއްޓުމަށް ނިންމި ނިންމުން ބަދަލުކޮށްފައެވެ.