ކުރިއަށް އޮތް ރިޔާސީ އިންތިޚާބުގައި ވޯޓުލުމަށް އިންޑިއާގެ ވެރިރަށް ނިއު ދިއްލީގެ އިތުރުން ސިންގަޕޫރުގައި ވެސް ވޯޓު ފޮށި ބަހައްޓަން އިލެކްޝަންސް ކޮމިޝަން (އީސީ) އިން ނިންމައިފި އެވެ.
އިލެކްޝަންސް ކޮމިޝަންގެ މެމްބަރު އަހްމަދު އަކުރަމް އާއި ހަވާލާދީ "ވީނިއުސް" އިން ރިޕޯޓްކުރާ ގޮތުގައި އަންނަ ސެޕްޓެމްބަރު މަހު ބައްވާ ރިޔާސީ އިންތިޚާބުގައި ނިއު ދިއްލީއާއި ސިންގަޕޫރުގައިވެސް ވޯޓު ފޮށި ބަހައްޓަން އެ ކޮމިޝަނުން ވަނީ މިހާރު ނިންމާފައެވެ.
އެގޮތުން ނިއު ދިއްލީ އާއި ސިންގަޕޫރުގައި ވެސް އެއް ވޯޓު ފޮށި ބަހައްޓަން ހަމަޖެހިފައިވާ ކަމަށް އަކްރަމް ވިދާޅުވި އެވެ.
މި އަހަރުގެ ރިޔާސީ އިންތިޚާބުގެ ވޯޓް ފޮށި މީގެ ކުރިން ބަހައްޓަން ނިންމާފައި އޮތީ ސްރީލަންކާގެ ކޮލޮމްބޯ އާއި މެލޭޝިއާގެ ކުއަލަލަމްޕޫރު އާއި އިންޑިއާގެ ޓްރިވެންޑްރަމް އަދި އިނގިރޭސިވިލާތުގެ ލަންޑަނުގައެވެ.
ސްރީލަންކާގައި ދެ ވޯޓު ފޮށި ބަހައްޓާ އިރު ދެން ކޮންމެ ގައުމެއްގައި ބަހައްޓަނީ އެންމެ ފޮއްޓެކެވެ.
ރިޔާސީ އިންތިޚާބު އޮންނާނީ އަންނަ ސެޕްޓެމްބަރު މަހުގެ 23 ވަނަ ދުވަހު އެވެ.
މި އަހަރުގެ އިންތިޚާބުގައި ވޯޓްލުމަށް 454 ވޯޓް ފޮށި ބެހެއްޓުމަށް ވަނީ ނިންމާފަ އެވެ.