އެމެރިކާގެ ވެބްސައިޓެއްކަމަށްވާ ސޮކާއެކްސް އިން ހާމަކުރި އެންމެ ފަހުގެ ރިޕޯޓްތަކުގައިވާގޮތުގައި މިވަގުތު ދުނިޔޭގައި ހުރި އެންމެ އަގުބޮޑު ޒުވާން ކުޅުންތެރިޔާ އަކީ ފްރާންސްގެ ކިލިއަން އެމްބާޕޭ އެވެ.
ސޮކާއެކްސްގެ ސްޓަޑީ އިން ދައްކާގޮތުގައި 21 އަހަރުން ދަށުގެ އެންމެ އަގުބޮޑު ކުޅުންތެރިންގެ ލިސްޓްގެ އެއްވަނައިގައި އެމްބާޕޭ ވަނީ 192 މިލިއަން ޔޫރޯގެ އަގަކާއިއެކު އެވެ. ދެވަނައިގައި ވަނީ މެންޗެސްޓަރ ޔުނައިޓެޑްގެ އިނގިރޭސި ފޯވަޑް މާކަސް ރަޝްފޯޑްއެވެ. އޭނާގެ އަގެއްކަމަށް 89 މިލިއަން ޔޫރޯ ކަނޑައަޅާފައިވާއިރު 88 މިލިއަން ޔޫރޯގެ އަގަކާއިއެކު މި ލިސްޓްގެ ތިންވަނައިގައި އުޅެނީ މެންޗެސްޓަރ ސިޓީ އަށް ކުޅޭ ބްރެޒިލް ފޯވަޑް ގެބްރިއަލް ޖެސޫސް އެވެ.
ސޮކާއެކްސް ރިޕޯޓަކީ ކުޅުންތެރިޔާ އާއި ގުޅުންހުރި ވަރަށް ގިނަ ޑޭޓާގެ މައްޗަށް ބިނާކޮށް ދިރާސާކުރުމަށްފަހު ތައްޔާރުކޮށްފައިވާ ރިޕޯޓެކެވެ. އޭގެތެރޭގައި، ކުޅުންތެރިޔާގެ އުމުރާއި، ކުޅޭ މަޤާމާއި، މިހާރު ކުޅޭ ކްލަބާއި، ކޮންޓްރެކްޓްގެ މުއްދަތާއި، ކުޅުންތެރިޔާ މާކެޓް ވެލިއު އަންނަ ބަދަލާއި ޤައުމީ ޓީމަށް ކުޅެފައިވާ މެޗުގެ އަދަދާއި، ދަނޑުމަތީގައި ކުޅެފައިވާ މިނެޓުގެ އިތުރުން ޖަހާފައިވާ ގޯލްގެ އަދަދާއި އެކުޅުންތެރިއެއްގެ ޓެކްނިކަލް ކޮލިޓީގެ އިތުރުން ލިބިފައިވާ އަނިޔާއާއި ގުޅުންހުރި މަޢުލޫމާތުތައް އަގުކަނޑައެޅުމަށް ބޭނުންކުރެއެވެ.
މިރިޕޯޓްގައިވާ ގޮތުގައި މާކެޓުގައި ކުޅުންތެރިންގެ އަގަށް އެންމެ ބޮޑު ބަދަލެއް އައިސްފައިމިވަނީ ބްރެޒިލްގެ ނޭމާ، ބާސެލޯނާ ދޫކޮށް ޕީއެސްޖީ އާއި ގުޅުނު ހިސާބުންނެވެ. އޭގެފަހުން އެމްބާޕޭ ވެސް ޕީއެސްޖީ އަށް ބަދަލުވުމާއި ގުޅިގެން ބަދަލުއައިސްފައިވެއެވެ.
މިލިސްޓުގެ ގަދަ 20 ގައި އެންމެ ގިނައިން ހިމެނެނީ ފްރާންސްގެ ކުޅުންތެރިންނެވެ. ފްރާންސްގެ ފަސް ކުޅުންތެރިން ހިމެނިފައިވާއިރު ބްރެޒިލްގެ ހަތަރު ކުޅުންތެރިން މިލިސްޓުން ޖާގަ ހޯދާފައިވެއެވެ. މި ލިސްޓްގައި ދެން އެންމެ ގިނަ ކުޅުންތެރިން ހިމެނެނީ އިންގްލެންޑް އަދި އިޓަލީ އިންނެވެ. މިއިން ކޮންމެ ޤައުމަކުން ތިން ކުޅުންތެރިން ހިމެނިފައިވެއެވެ. މި ލިސްޓްގައި ދެން ހިމެނެނީ ވަރުގަދަ ސްޕެއިނުގެ އިތުރުން ޖެމެއިކާ، އެމެރިކާ، ނެދަލޭންޑްސް އަދި ތުރުކީ އެވެ. މިއިން ކޮންމެ ޤައުމަކުން ކުޅުންތެރިއަކު މި ލިސްޓްގައި ހިމެނިފައިވެއެވެ.
މި ލިސްޓްގައި ނުހިމެނޭ ޤައުމުތަކުގެ ތެރޭގައި ޖަރުމަނާއި އާޖެންޓީނާގެ އިތުރުން ޕޯޗުގަލް، ބެލްޖިއަމް އަދި އުރުގުއޭ އާއި މެކްސިކޯ ހިމެނެއެވެ.
އެންމެފަހުން ނެރުނު ރިޕޯޓްގައިވާ 21 އަހަރުން ދަށުގެ އެންމެ އަގުބޮޑު ކުޅުންތެރިންގެ ލިސްޓް ތިރީގައި ބަޔާންކޮށްފައިމިވަނީ އެވެ.
1. ކިލިއަން އެމްބާޕޭ (ފްރާންސް)
2. މާކަސް ރަޝްފޯޑް (އިންގްލެންޑް)
3. ގެބްރިއަލް ޖެސޫސް (ބްރެޒިލް)
4. އޮސްމާނޭ ޑެމްބެލޭ (ފްރާންސް)
5. މެލްކޮމް (ބްރެޒިލް)
6. ފެޑެރީކޯ ޗިއޭސާ (އިޓަލީ)
7. ޖިއަންލުއިޖީ ޑޮނަރުއްމާ (އިޓަލީ)
8. ކްރިސްޓިއަން ޕުލިސިޗް (އެމެރިކާ)
9. ލިއޯން ބެއިލީ (ޖެމެއިކާ)
10. މިކޭލް އޮޔަޒަބާލް (ސްޕެއިން)
11. ރަޔާން ސެސެނިޔޯން (އިންގްލެންޑް)
12. ޓްރެންޓް އެލެކްސެންޑަ އާނޯލްޑް (އިންގްލެންޑް)
13. މަތައިސް ޑި ލައިޓް (ނެދަލޭންޑްސް)
14. ވިނީސިއަސް ޖޫނިއަރ (ބްރެޒިލް)
15. ރޮޑްރީގޯ (ބްރެޒިލް)
16. ޑަޔޮޓް އުޕަމެކާނޯ (ފްރާންސް)
17. ޕެޓްރިކް ކުޓްރޯނޭ (އިޓަލީ)
18. ހުސާމް އައުއާރ (ފްރާންސް)
19. އެލަން ސެއިންޓް މެކްސިމިން (ފްރާންސް)
20. ޗެންގިޒް އުންޑާ (ތުރުކީ)
މަތީގައިވާ ލިސްޓްގައިވާ ކުޅުންތެރިންގެ ތެރެއިން އެންމެ ގިނަ ކުޅުންތެރިން ކުޅެނީ ފްރެންޗް އަދި އިޓަލިއަން ލީގުގައެވެ. ދެން، އެންމެ ގިނަ އަދަދެއްގެ ކުޅުންތެރިން ނިސްބަތްވަނީ އިނގިރޭސި އަދި ޖަރުމަނުގެ ލީގަށެވެ.