އިނގިރޭސި ކްލަބް ޗެލްސީ އިން ވަނީ ކުރިއަށް އޮތް ސީޒަނުގައި އެޓީމު ރަށުންބޭރުގައި ކުޅޭ މެޗުތަކުގައި ބޭނުންކުރާނެ އައު ޖާޒީ ދައްކާލައިފައެވެ.
ޗެލްސީގެ ކިޓް ސްޕޮންސަރ ނައިކީ އިން އެންމެ ފަހުން ދައްކާލައިފައިވާ ޖާޒީ ފަރުމާކޮށްފައިވަނީ ރީނދޫކުލައިގައެވެ. މިއީ 2014/15 ވަނަ އަހަރުގެ ސީޒަނަށްފަހު އެޓީމުން ރީނދޫކުލައިގެ ޖާޒީއެއްގައި ނިކުންނާނެ ފުރަތަމަ ފަހަރެވެ. މީގެކުރީން 1960 ގެ އަހަރުތަކުގެ އިތުރުން 1980 އަދި 1990 ގައި ބޭނުންކުރި ރީނދުކުލައިގެ ޖާޒީ ވެފައިވަނީ ޢާއްމުންގެ މެދުގައި މަޤްބޫލްކަން ހޯދާފައިވާ ޖާޒީއަކަށެވެ.
ނައިކީއިން ތަޢާރަފްކުރި ރީނދޫ ޖާޒީއާއިއެކު ތައްޔާރުކުރެވިފައިވަނީ ރީނދޫ ކުލައިގެ ސޯޓެކެވެ. މިއާއިއެކު ބޭނުންކުރުމަށް ހަމަޖެހިފައިވަނީ ނޫކުލައިގެ އިސްޓާކީނެވެ. އޭގައި ހުރަހަށް ރީނދޫކުލައިން ދެ ރޮނގު ކުރަހާފައިވެއެވެ.
މީގެއިތުރުން، މިފަހަރުގެ ޖާޒީގައި ނައިކީއިން ވަނީ އެކްލަބުގެ ފަޚުރުވެރި މާޒީ ދައްކުވައިދިނުމުގެ ގޮތުން އެކުލަބުގެ ބެޖުގައި ހިމެނޭ ސިންގާވެސް ޖާޒީގައި ކުރެހުމެއްގެ ސިފައިގައި ގެނެސްދީފައެވެ. އެސިންގާގެ ވަށައިގެން ލިޔެވިފައިވަނީ 'ފުޓްބޯލް އިޒް ދަ ގޭމް' އަދި 'ބްލޫ އިޒް ދަ ކަލަރ' މިހެންނެވެ. މިއީ އެކްލަބުގެ ލަވައިގައި ހިމެނޭ ފުރަތަމަ ދެ ބަސްކޮޅެވެ. ހަމަ މިގޮތަށް އެ ކްލަބުގެ ހޯމް ޖާޒީގައި ވެސް މިހުރިހާ ބައެއް ހިމަނާފައިވާކަމަށްވެއެވެ.
ކުރިއަށް އޮތް ސީޒަނުގައި އަމިއްލަ ދަނޑުގައި ކުޅޭ މެޗުތަކުގައި އެޓީމު ބޭނުންކުރާ ޖާޒީ ފަރުމާކޮށްފައިވަނީ ހުސް ނޫ ކުލައިންނެވެ. މިއާއިއެކު ބޭނުންކުރުމަށް ހަމަޖެހިފައިވަނީ ނޫކުލައިގެ ސޯޓާއި ހުދުކުލައިގެ އިސްޓާކީނެވެ. މީގެކުރިން ބޭއްވި ހަފްލާއެއްގައި އެޖާޒީ ވަނީ ދައްކާލައިފައެވެ.
ޗެލްސީގެ އައު ރީނދޫ ޖާޒީ ލައިގެން އެޓީމު ކުޅޭ ފުރަތަމަ މެޗުގައި އިޓަލީގެ އިންޓަ މިލާނާއި ދެކޮޅަށް ނިކުންނާނީ މިމަހުގެ 28 ވަނަ ދުވަހުއެވެ. އެމެޗު ކުޅެވޭނީ ފްރާންސްގެ ނީސްގައެވެ.