މެޑްރިޑް، ސްޕެއިން: ބްރެޒިލްގެ ކްލަބެއްކަމަށްވާ ފްލެމެންގޯ އަށް ކުޅެމުން އައި އުމުރުން 18 އަހަރުގެ ފޯވާޑް ވިނީސިއަސް ޖޫނިއަރ ސްޕެއިނުގެ ރެއާލް މެޑްރިޑަށް ބަދަލުވެއްޖެއެވެ.
އެންމެފަހުގެ މީޑިއާ ރިޕޯޓްތައް ބުނާގޮތުގައި ވިނީސިއަސް ރެއާލަށް ބަދަލުވެފައި ވަނީ 38.7 މިލިއަން ޕައުންޑްގެ ޓްރާންސްފާ ފީ އަކަށެވެ. މިއާއިއެކު އޭނާވެފައިވަނީ ދުނިޔޭގެ ތިންވަނައަށް އެންމެ އަގުބޮޑު ޒުވާން ކުޅުންތެރިޔާއަށެވެ.
މީގެކުރިން އިންގްލެންޑްގެ މެންޗެސްޓަރ ޔުނައިޓެޑުން ވަނީ 2015 ވަނަ އަހަރުގެ ސެޕްޓެންބަރު މަހު ފްރާންސްގެ މޮނާކޯ އަށް ކުޅެމުން ދިޔަ 19 އަހަރުގެ އެންތަނީ މާޝިއަލް ގެންދިއުމަށް ބޯނަހާއިއެކު 58 މިލިއަން ޕައުންޑްގެ ޓްރާންސްފާ ފީ އަކަށް އެޓީމާއިއެކު އެއްބަސްވެފައެވެ. އޭގެފަހުން، ފްރާންސްގެ އުމުރުން 19 އަހަރުގެ ކިލިއަން އެމްބާޕޭ ގެނައުމަށް ޕީއެސްޖީއިން ވަނީ 166 މިލިއަން ޕައުންޑުގެ ފީ އަކަށް މޮނާކޯ އާއި އެކު އެއްބަސްވެފައެވެ.
މިއަދު ސެންޓިއާގޯ ބާނެބެއޫ ސްޓޭޑިއަމްގައި ވިނީސިއަސް ޖޫނިއަރ ރަސްމީކޮށް މީޑިއާ އަށް ދައްކާލުމަށް ބޭއްވި ހަފްލާއަށްފަހު ދިން އިންޓަވިއުގައި މެޑްރިޑްގެ ރައިސް ފްލޮރެންޓީނޯ ޕެރޭޒް ބުނީ ވިނީސިއަސް އަކީ ބްރެޒިލް އަދި ދުނިޔޭގެ ފުޓްބޯޅައިގައިވެސް ގިނަ އުއްމީދުތަކެއް ގުޅިފައިވާ ކުޅުންތެރިއެއްކަމަށެވެ.
ފޯވާޑެއްގެ އިތުރުން ވިންގަށްވެސް ކުޅެވޭ ވިނީސިއަސް ވަނީ ފްލެމެންގޯ އަށް ލީގުގައި ކުޅުނު 37 މެޗުގައި ޖުމްލަ 7 ގޯލް ކާމިޔާބުކޮށްދީފައެވެ.
މީގެއިތުރުން އޭނާ ވަނީ މިދިޔަ އަހަރު ބްރެޒިލުން 17 އަހަރުން ދަށުގެ ސައުތު އެމެރިކަން ޗެމްޕިއަންޝިޕް ހޯދިއިރު އެމުބާރާތުގެ މޮޅު ކުޅުންތެރިޔާގެ މަޤާމްވެސް ހޯދާފައެވެ.
ވިނީސިއަސް ޖޫނިއަރ އަކީ މިފަހަރުގެ ޓްރާންސްފާ ބާޒާރުގައި ރެއާލަށް ގެނައި ދެވަނަ ކުޅުންތެރިޔާއެވެ. މީގެކުރިން އެޓީމަށް ވަނީ ސްޕެއިނުގެ ވޯލްޑްކަޕް ސްކޮޑްގައި ހިމެނުނު ރެއާލް ސޮސިއެޑާޑްގެ ޒުވާން ޑިފެންޑަރު އަލްވާރޯ އޮޑްރިއޮޒޯލާ ވެސް ގެނެސްފައެވެ.