ރައީސް އަބްދުﷲ ޔާމީންގެ ސަރުކާރުގެ ހެޔޮފުޅުކަމާއި މޮޅުކަމުގެ ވާހަކަ ރައްޔިތުންނާއި ހަމައަށް ގެނެސްދިނުމަށް ހެދި ވެބްސައިޓެއްގައި ހުރި މައުލޫމާތު ބުނާގޮތުން އައްޑޫ ލިންކް ރޯޑު މަރާމާރު ކުރުމުގެ މަސައްކަތް ނިންމާލައިފިއެވެ. އެކަމަށް ދައުލަތުގެ ބަޖެޓުން 1,294,917.20 ރ. (އެއް މިލިއަން ދެލައްކަ ނުވަދިހަ ހަތަރު ހަސް ނުވަސަތޭކަ ސަތާރަ ރުފިޔާ ވިހި ލާރި) ޚަރަދުކޮށްފިއެވެ.
ސަރުކާރުން ލިންކް ރޯޑު މަރާމާތުކޮށް ނިންމާލި ކަމަށް ބުންޏަސް، އެމަގުގެ އެކި ހިސާބުތަކުގައި ބޮޑެތި ވަޅުގަނޑުތައް އެބަހުއްޓެވެ. ތާރުގަނޑު ކަނޑައިގެން ގޮސްފައިވާ ހިސާބުތައް އެހާ ގިނައެވެ.
އެވަޅުގަނޑުތަކާއި ހެދި މަގުން ދަތުރުކުރާ މީހުންނަށް ދަތިތަކާއި ކުރިމަތިލާން ޖެހިފައިވާތާ އެތައް ދުވަހެއް ވެއްޖެއެވެ. އެތައް ބަޔަކަށް އަނިޔާވެސް ލިބިއްޖެއެވެ. އެހެނަސް ސަރުކާރުގެ ފަރާތުން ވެބްސައިޓެއްގައި ލިޔެފައި މިވަނީ، ލިންކް ރޯޑު މަރާމާތުކޮށް ނިމިއްޖެ ކަމަށެވެ.
ސަރުކާރުން ރައްޔިތުންނަށް އޮޅުވާލަން މަސައްކަތް ކުރަނީ ހެއްޔެވެ؟ އުއްމީދަކީ ނުވަތަ ޤަބޫލުކުރާ ހިތްވަނީ އެހެން އެކަން ސަރުކާރުން ނުކުރާނެ ކަމަށެވެ.
އެހެން ނުވެއްޖެ ނަމަ ސަރުކާރަށް އޮޅުގެން މަރާމާތުކޮށް ނިމުނީ ކަމަށް ލިޔެވުނީ ހެއްޔެވެ؟ ކޮންމެ ގޮތަކަށް ކަންތައް ވިޔަސް، ހަގީގަތަކީ އައްޑޫ ލިންކް ރޯޑު މަރާމާތުކޮށް ނުނިމޭ ކަމެވެ. އެ މަސައްކަތް މި ސަރުކާރުގައި އެކަށީގެންވާ ގޮތެއްގައި ނުކުރެވޭ ކަމެވެ.
އެކަމަށް އައްޑޫ ރައްޔިތުން ހެކިވާނެއެވެ. ސަރުކާރާއި ދެކޮޅު ރައްޔިތުން އެކަންޏެއް ނޫނެވެ. ހުރިހާ ސިޔާސީ ފިކުރެއްގެ ރައްޔިތުން ވެސް އެކަން ގަބޫލުކުރާނެއެވެ. އެއީ ކޮންމެ ދުވަހަކު ވެސް އެންމެން ދަތުރުކުރަން މިޖެހެނީ އެ ވަޅުގަނޑުތަކުގެ ތެރެއިން ކަމަށް ވީމައެވެ.