އާސީޒަނަށް ތައްޔާރުވުމަށްޓަކައި ކުޅޭ އިންޓަނޭޝަނަލް ޗެމްޕިއަންސް ކަޕްގައި އިއްޔެ ކުޅުނު މެޗުން ފްރާންސްގެ ޗެމްޕިއަން ޕީއެސްޖީ ބަލިކޮށް ޖަރުމަނުގެ ޗެމްޕިއަން ބަޔާން މިޔުނިކް ފެށުން ރަނގަޅުކޮށްފިއެވެ.
މިމެޗުން ބަޔާން 3-1 އިން މޮޅުވިއިރު އެޓީމުގެ ލަނޑުތައް ކާމިޔާބުކޮށްދިނީ ހަވިއާ މާޓިނޭޒް އާއި ރެނާޓޯ ސަންޗޭސްގެ އިތުރުން ޖޯޝުއާ ޒާރްކްޒީ އެވެ. ޕީއެސްޖީގެ ހަމައެކަނި ލަނޑުޖަހައިދިނީ ޓިމޮތީ ވެއާ އެވެ.
ޕީއެސްޖީ އަށް މުޅި މެޗުގައި ބަޔާންގެ ގޯލަށް އަމާޒުކޮށް ދެ ހަމަލާ ފޮނުވާލެވިފައިވާއިރު ގިނަ ވަގުތު ބޯޅަ ގެންގުޅުނު ބަޔާން ވަނީ ޕީއެސްޖީގެ ގޯލަށް އަމާޒުކޮށް 8 ހަމަލާ ފޮނުވާލައިފައެވެ.
މިމެޗުގައި ކުރިން ލީޑް ނެގީ ފުރަތަމަ ހާފުގެ 31 ވަނަ މިނެޓުގައި ޕީއެސްޖީ އިންނެވެ. މިލަނޑު އެޓީމަށް ކާމިޔާބުކޮށްދިނީ ކެވިން ރިމާނެ ދިން ބޯޅައަކުން ޓިމޮތީ ވެއާ އެވެ.
މެޗުގެ ފުރަތަމަ ހާފު ނިމިގެންދިޔައީ 1-0 އިން ޕީއެސްޖީ ކުރީގައޮވެގެންނެވެ.
ފުރަތަމަ ހާފުގައި ޕީއެސްޖީގެ ގޯލް ބެލެހެއްޓީ ދާދިފަހުން އިޓަލީގެ ޔުވެންޓަސް އިިން ފްރީ ޓްރާންސްފާގައި އެޓީމަށް ބަދަލުވި ތަޖުރިބާކާރު ގޯލްކީޕަރު ޖިއާންލުއިޖީ ބުފޮން އެވެ. ދެވަނަ ހާފުގެ ކުރީކޮޅު އޭނާގެ ބަދަލުގައި ކުޅެން ނިކުތީ ޒުވާން ކީޕަރު ރެމީ ޑެޝާމްޕްސް އެވެ.
މިމެޗުގެ ދެވަނަ ހާފު ފެށިގެން 15 ވަރަކަށް މިނެޓުގެތެރޭގައި ބަޔާން އަށް ނަތީޖާ ހަމަހަމަކޮށްދިނީ ސްޕެއިނުގެ މިޑްފީލްޑަރު ހަވިއާ މާޓިނޭޒް އެވެ. މިއީ އެޓީމަށް ކުޅޭ ހޮލެންޑްގެ ތަޖުރިބާކާރު ވިންގާ އާރެން ރޮބެން ނަގައިދިން ކޯނަރަކުން ލިބުނު ބޯޅަ އޭނާ ބޮލުން ފޮނުވާލައިގެން ކާމިޔާބުކުރި ގޯލެކެވެ.
އޭގެ 9 މިނެޓުފަހުން ބަޔާން އަށް މިމެޗުގައި ފުރަތަމަ ފަހަރަށް ލީޑް ނަގައިދިނީ ލިބުނު ހިލޭ ޖެހުމަކުން ޕޯޗުގަލްގެ މިޑްފީލްޑަރު ރެނާޓޯ ސަންޗޭސް އެވެ.
ބަޔާންގެ ތިންވަނަ ލަނޑުޖަހައިދިނީ މެޗުނިމެން 12 މިނެޓަށްވެފައިވަނިކޮށް ސާޖް ނެބްރީ ދިން ބޯޅައަކުން ޒާރްކްޒީ އެވެ. މިއީ ހޮލެންޑްގެ އުމުރުން 17 އަހަރުގެ ފޯވާޑް ޒާރްކްޒީ ޕީއެސްޖީގެ ޕެނަލްޓީއޭރިޔާތެރެއިން އެއްފަހަރުން ފޮނުވާލައިގެން ކާމިޔާބުކުރި ގޯލެކެވެ.
މިމުބާރާތުގެ އިއްޔެ ކުޅުނު ފުރަތަމަ މެޗުގައި ޖަރުމަނުގެ ބޮރޫޝިއާ ޑޯޓްމުންޑް ވަނީ އިންގްލެންޑްގެ ޗެމްޕިއަން މެންޗެސްޓަރ ސިޓީ ބަލިކޮށްފައެވެ. މިމެޗު 1-0 އިން އެޓީމު ކާމިޔާބުކުރިއިރު ހަމައެކަނި ގޯލް ޖަހައިދިނީ ފުރަތަމަ ހާފުގައި ލިބުނު ޕެނަލްޓީއަކުން މާރިއޯ ގޮޓްޒާ އެވެ.