ޒިމްބާބުވޭގެ ކުރީގެ ރައީސް ރޮބަޓް މުގާބޭގެ ސަރުކާރުގައި އެނާޖީ މިނިސްޓަރުކަން ކުރެއްވި ސެމިއުއެލް އުންޑެންޖީ 4 އަހަރަށް ޖަލަށް ލުމަށް އެ ގައުމުގެ ކޯޓަކުން ހުކުމްކޮށްފިއެވެ.
ސެމިއުއެލް އުންޑެންޖީ ޖަލަށް ލުމަށް ހުކުމް ކުރީ އޭނާގެ މައްޗަށް އުފުލާފައިވާ ޚިޔާނާތުގެ މައްސަލަ ސާބިތުވުމާއި ގުޅިގެންނެވެ. އުންޑެންޖީ އަކީ މުގާބޭގެ ސަރުކާރުގެ އިސްވެރިންގެ ތެރެއިން ކުށް ސާބިތުވި ފުރަތަމަ ފަރާތެވެ.
އުންޑެންޖީގެ މައްޗަށް ޚިޔާނާތުގެ ދައުވާ އުފުލާފައިވަނީ، ބިޑް ކުރުމަކާއި ނުލައި 12650 ޑޮލަރުގެ ކޮންޓްރެކްޓެއް ހަވާލުކުރި މައްސަލައެއްގައެވެ.
އުންޑެންޖީގެ ވަކީލު ބުނެފައިވާ ގޮތުގައި ކޯޓުން ކުރި ހުކުމާއި އެކު އޭނާއަށް ބޮޑު ހައިރާންކަމެއް ލިބިފައިވާ ކަމަށާއި އަދި އެ ހުކުމް އިސްތިއުނާފް ކުރާނެ ކަމަށެވެ.
4 އަހަރުގެ ހުކުމެއް އިއްވި ނަމަވެސް އުންޑެންޖީ ޖަލުގައި ހުންނަން ޖެހޭނީ 2 އަހަރާއި ބައިގެ މުއްދަތަކަށެވެ. އެއީ އޭނާގެ މައްޗަށް އިއްވި ޖަލުހުކުމުން 18 މަސް ދުވަސް މައާފުކުރުމަށް ކޯޓުން ނިންމާފައިވާތީއެވެ.