ސްޕެނިޝް ސުޕަކަޕްގައި ބާސެލޯނާ އާއި ސެވިއްޔާ ބައްދަލުކުރާމެޗު މިފަހަރު ކުޅުމަށް ހަމަޖެހިފައިވަނީ މޮރޮކޯގައެވެ. މިއީ ސްޕެއިނުން ބޭރުގައި މިމުބާރާތް ކުޅޭ ފުރަތަމަ ފަހަރެވެ.
މިމެޗު ކުޅެވޭނީ އަންނަ އޯގަސްޓްމަހުގެ 12 ވަނަ ދުވަހު ޓެންޖިއަރގެ ސްޓޭޑް އިބްނު ބަތޫތާ ސްޓޭޑިއަމްގައެވެ.
މީގެކުރިން ސުޕަކަޕް ކުޅެމުން އައިސްފައިވަނީ ދެލެގަށް ބަހާލައިގެން، ކޮންމެ ޓީމެއްވެސް އެބައެއްގެ ދަނޑުގައި މެޗެއް ކުޅޭ އުސޫލުންނެވެ. އެހެންނަމަވެސް، މިފަހަރު ތަފާތުކޮށްލުމުގެ ގޮތުން މިމުބާރާތުގައި ކުޅުމަށް ހަމަޖެހިފައިވަނީ އެންމެ މެޗެކެވެ.
މިދިޔަ ސީޒަނުގައި ސްޕެއިނުގެ ޑޮމެސްޓިކް ދެމުބާރާތުގެ ޗެމްޕިއަންކަން ހޯދާފައިވުމުން ބާސެލޯނާ ކޮލިފައިވެފައިވާތީވެ މިމެޗުގައި ދެން ނިކުންނާނީ ސްޕެނިޝްކަޕްގެ ފައިނަލްގައި އެޓީމު އަތުން ބަލިވި ސެވިއްޔާއެވެ.
މިއީ ވޭތުވެދިޔަ 10 އަހަރުގެތެރޭގައި ބާސެލޯނާއިން މިމުބާރާތުގައި ވާދަކުރާ 9 ވަނަ ފަހަރެވެ. ނިމިދިޔަ ސީޒަނުގައި މިމުބާރާތުގައި އެޓީމު ވަނީ 1-5 ގެ އެގްރިގޭޓަކުން ރެއާލް މެޑްރިޑް އަތުން ބަލިވެފައެވެ.