އިލެކްޝަން ކޮމިޝަން(އީސީ) އާއި ދެކޮޅަށް އަޑުއުފުލައި މާދަމާ މުޒާހަރާ ކުރަން ގުޅިފައިވާ އިދިކޮޅު ސިޔާސީ ޕާޓީތަކުން ނިންމައިފި އެވެ.
އިދިކޮޅު ޕާޓީތަކުން ބުނެފައިވާ ގޮތުގައި މުޒާހަރާ ކުރާނީ އީސީގެ އިދާރާގެ ކުރިމަތީގައި މާދަމާ މެންދުރު ފަހު 1:30ގައި ކަމަށެވެ.
އިލެކްޝަންސް އާއި ދެކޮޅަށް މުޒާހަރާކުރަން އިދިކޮޅު ފަރާތްތަކުން ނިންމާފައިވާއިރު، ރާއްޖޭގައި މިނިވަން އިންސާފުވެރި އިންތިހާބެއް ބޭއްވިދާނެ ކަމާމެދު ގިނަ ބަޔަކު ދަނީ ސުވާލު އުފައްދަމުންނެވެ.
އެގޮތަށް ސުވާލު އުފައްދަން ފަށާފައިވަނީ ފަހަކަށް އައިސް އިލެކްޝަންސް ކޮމިޝަނުން އަމަލުކުރަމުންދާ ގޮތުންނެވެ. އެކޮމިޝަނުން ވަނީ ރިސޯޓުތަކުގައި ބަހައްޓާ ވޯޓު ފޮށީގެ އަދަދު މަދުކުރުމަށް ނިންމައި، އަދި ހާއްސަ އެހީއަށް ބޭނުންވާ މީހުންނަށް އިލެކްޝަން ކޮމިޝަނުން ކަނޑައަޅާ އޮފިޝަލުން ވޯޓުލައިދޭނެ ކަމަށް ވެސް ކަނޑައަޅާފައެވެ.
އެކަމާއި ގުޅިގެން އިދިކޮޅު ޕާޓީތަކުން ނުރުހުން ފާޅުކުރަމުން ދަނިކޮށް އިލެކްޝަންސް އިން ވަނީ އެކޮމިޝަނުގެ ނިންމުން އަނބުރާ ގެންގޮސްފައެވެ.
އިދިކޮޅު ފަރާތްތަކުން މިހާރު އެންމެ ބޮޑަށް ކަންބޮޑުވުން ފާޅުކުރަނީ ރީ ރަޖިސްޓްރީގެ ކަންކަން ސަރުކާރުގެ ކުންފުނިތަކުން ކުރަމުން ގެންދާތީއެވެ.